ශ්රී ලංකාවේ පෞරාණික සංස්කෘතික උරුමයන් සුරක්ෂිත කරමින් සහ සත්ව සුභසාධන නීති රීති සමකාලීන අවශ්යතාවලට ගැළපෙන පරිදි යාවත්කාලීන කරමින්, හීලෑ අලි ඇතුන් නියාමනය කිරීම සහ සංස්කෘතික කටයුතු සඳහා ලබා දීම සම්බන්ධයෙන් විධිමත් නීතිමය ක්රමවේදයක් සැකසීමේ විශේෂ කමිටුව ඊයේ (16) ප්රථම වරට රැස්විය. පරිසර අමාත්යාංශයේ වනජීවී හා වන සම්පත් සංරක්ෂණ අංශයේදී පැවැත්වුණු මෙම ආරම්භක රැස්වීමේ මුලසුන හෙබවූයේ පරිසර අමාත්යාංශයේ අතිරේක ලේකම් බුවනෙක හේරත් මහතා විසිනි. පරිසර අමාත්ය වෛද්ය දම්මික පටබැඳි සහ නියෝජ්ය අමාත්ය ඇන්ටන් ජයකොඩි යන මහත්වරුන්ගේ සෘජු උපදෙස් මත පිහිටුවන ලද මෙම කමිටුවේදී, පවතින නීතිමය තත්ත්වයන් සහ ඒවායේ ප්රායෝගික ක්රියාකාරීත්වය දීර්ඝ වශයෙන් සමාලෝචනය කෙරුණු අතර නව රජයේ ප්රතිපත්ති ද ඇතුළත් කරමින් පවතින නීති විධිමත් කොට නව නීති පද්ධතියක් සකස් කිරීමේ මූලික වැඩපිළිවෙල පිළිබඳව සාකච්ඡා විය.
වනජීවී සංරක්ෂණ දෙපාර්තමේන්තුවේ අධ්යක්ෂ ජනරාල් රන්ජන් මාරසිංහ, ජාතික සත්වෝද්යාන දෙපාර්තමේන්තුවේ අධ්යක්ෂ ජනරාල් චන්දන රාජපක්ෂ, බෞද්ධ කටයුතු කොමසාරිස් ජනරාල් ආර්. එම්. ජී. සේනාරත්න, සංස්කෘතික කටයුතු අධ්යක්ෂ කේ. සිරිවර්ධන දිල්හානි, පරිසර අමාත්යාංශයේ නීති නිලධාරී ඊ. ඒ. එම්. සී. ඒකනායක, වනජීවී සංරක්ෂණ දෙපාර්තමේන්තුවේ විශ්රාමික අධ්යක්ෂ ජනරාල් ආනන්ද විජේසූරිය සහ ප්රසිද්ධ පරිසර නීතිඥ ආචාර්ය ජගත් ගුණවර්ධන යන මහත්ම මහත්මීහු මෙම විශේෂ විද්වත් කමිටුවේ සාමාජිකයන් ලෙස කටයුතු කරති. ඉදිරි මාස කිහිපය ඇතුළත පවතින නීති සංශෝධනය කරමින් සහ නව නීති රීති සම්පාදනය කරමින් ලංකාවේ හීලෑ අලි ඇතුන් නියාමනය කිරීම සහ සංස්කෘතික උත්සව සඳහා උන් නිල වශයෙන් ලබා දීමට අදාළ නීති රාමුව සම්පූර්ණයෙන්ම විධිමත් කිරීම මෙම කමිටුවේ මූලික අපේක්ෂාවයි.
