දේශීය ආදායම් දෙපාර්තමේන්තුවේ බදු ආදායම් පුළුල් කිරීම සහ කාර්යක්ෂමතාව ඉහළ නැංවීම පිළිබඳ විශේෂ සමාලෝචන සාකච්ඡාවක් ජනාධිපති අනුර කුමාර දිසානායක මහතාගේ ප්රධානත්වයෙන් ඊයේ (27) ජනාධිපති කාර්යාලයේදී පැවැත්විණි. 2026 වසරේ මේ දක්වා දෙපාර්තමේන්තුව අත්පත් කරගෙන ඇති ප්රගතිය මෙහිදී ඇගයීමට ලක්වූ අතර, හිඟ බදු අයකර ගැනීම සහ බදු අනුකූලතාව උපරිම කිරීම සඳහා ගත යුතු ඉදිරි පියවර පිළිබඳව ද අවධානය යොමු විය.
මෙහිදී ජනාධිපතිවරයා අවධාරණය කළේ බදු පද්ධතිය නවීකරණය කිරීමේ වැදගත් පියවරක් වන ජාතික ‘e-invoicing’ පද්ධතිය හඳුන්වා දීමේ කටයුතු නියමිත කාලරාමුව තුළ නිම කළ යුතු බවයි. ආයතනික ප්රතිව්යුහගතකරණය සහ සමස්ත ක්රියාවලිය ඩිජිටල්කරණය කිරීම හරහා බදු පරිපාලනයේ පවතින ගැටලු අවම කරගත හැකි බව ජනාධිපතිවරයා පෙන්වා දුන්නේය. මෙම අවස්ථාවට නියෝජ්ය අමාත්ය ආචාර්ය අනිල් ජයන්ත ප්රනාන්දු, නිශාන්ත ජයවීර සහ දේශීය ආදායම් කොමසාරිස් ජනරාල්වරිය ඇතුළු ජ්යෙෂ්ඨ නිලධාරීන් පිරිසක් එක්ව සිටියහ.
