ශ්රී ලංකා මහා භාණ්ඩාගාරයේ (General Treasury) පරිගණක පද්ධතියකට ඇතුළු වී හැකර්වරුන් (Hackers) විසින් ඇමරිකානු ඩොලර් මිලියන 2.5ක මුදලක් වංචනික ලෙස ලබාගැනීමේ සිද්ධිය සම්බන්ධයෙන් පුළුල් විශේෂ විගණනයක් (Special Audit) ආරම්භ කර ඇති බව විගණකාධිපති දෙපාර්තමේන්තුව (National Audit Office) පවසයි.
විගණකාධිපති දෙපාර්තමේන්තුවේ ජ්යෙෂ්ඨ ප්රකාශකයෙකු සඳහන් කළේ, මෙම මහා පරිමාණ මූල්ය කොල්ලය සිදුවූයේ කෙසේද, භාණ්ඩාගාරයේ දත්ත පද්ධතියේ පවතින ආරක්ෂක දුර්වලතා මොනවාද සහ මීට රාජ්ය නිලධාරීන්ගේ කිසියම් සම්බන්ධතාවයක් හෝ නොසැලකිලිමත්කමක් බලපා තිබේද යන්න පිළිබඳව මෙම විගණනයේදී දැඩි ලෙස අවධානය යොමුකරන බවයි.
මෙම සයිබර් ප්රහාරය (Cyber attack) හේතුවෙන් රජයට සිදුව ඇති අලාභය සහ මින් පෙර මෙවැනි ආරක්ෂක දෝෂ පැවතියේද යන්න පිළිබඳව සොයා බලා, ඊට අදාළ සවිස්තරාත්මක වාර්තාවක් කඩිනමින් පාර්ලිමේන්තුවට ඉදිරිපත් කිරීමට නියමිතය. මේ අතර, මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව (CID) සහ ශ්රී ලංකා පරිගණක හදිසි ප්රතිචාර සංසදය (SLCERT) එක්ව වෙනමම අපරාධ විමර්ශනයක් ද මේ වන විටත් ක්රියාත්මක කර තිබේ.
