ශ්රී ලංකා මහා භාණ්ඩාගාරය විසින් විදෙස් ණය වාරිකයක් ලෙස ගෙවීමට උත්සාහ කළ අමෙරිකානු ඩොලර් මිලියන 2.5ක මුදලක් හැකර්වරුන් අතට පත්වීමේ සිද්ධිය සම්බන්ධ විමර්ශනවල සැලකිය යුතු ප්රගතියක් පවතින බව ඩිජිටල් ආර්ථික නියෝජ්ය අමාත්ය එරංග වීරරත්න මහතා පවසයි. මෙම මුදල් වංචාව සිදුව ඇත්තේ සෘජුවම බැංකු පද්ධතිය හැක් කිරීමකට වඩා, විදෙස් සමාගමේ විස්තරවලට සමාන ව්යාජ ඊමේල් (Email) ලිපින සහ දත්ත මගින් නිලධාරීන් නොමඟ යැවීම හරහා බව අනාවරණය වී තිබේ.
අමාත්යවරයා වැඩිදුරටත් සඳහන් කළේ මෙම ගනුදෙනුව බැංකු පද්ධතිය හරහාම සිදුව ඇති බැවින් එහි සුලමුල සොයා ගැනීම සඳහා රහසිගතව විමර්ශන මෙහෙයවන බවයි. සයිබර් අපරාධකරුවන් සාක්ෂි මකා දැමීමට ඇති ඉඩකඩ සලකා ඇතැම් තොරතුරු දැනට රහසිගතව තබා ගන්නා බවත්, නීතිය ක්රියාත්මක කිරීමට අවශ්ය අවසන් තහවුරු කිරීම් සඳහා තවත් සතියක පමණ කාලයක් ගතවනු ඇති බවත් ඔහු පැවසීය.
රාජ්ය ආයතනවල ඩිජිටල් ආරක්ෂාව තහවුරු කිරීම සඳහා ආයතන 37ක් ඒකාබද්ධ කරමින් පැය 24 පුරා ක්රියාත්මක “ජාතික සයිබර් ආරක්ෂණ මෙහෙයුම් මධ්යස්ථානය” (National Cyber Security Operation Center) දැනටමත් ස්ථාපිත කර ඇති බව ද මෙහිදී අනාවරණය විය. කෘත්රිම බුද්ධිය (AI) සහිත නවීන මෘදුකාංග මගින් සයිබර් ප්රහාර කල්තියා හඳුනා ගැනීමට රජය පියවර ගෙන ඇති අතර, මූල්ය ගනුදෙනුවලදී වඩාත් විමසිලිමත් වන ලෙස නිලධාරීන්ට උපදෙස් දී තිබේ.
