ශ්රී ලංකාව සහ ටර්කිෂ් එයාර්ලයින්ස් අතර ගුවන් සේවා, සංචාරක ව්යාපාරය සහ වෙළෙඳ කටයුතු තවදුරටත් ප්රවර්ධනය කිරීමේ අරමුණින් විශේෂ සාකච්ඡාවක් පැවැත්වී තිබේ. තුර්කියේ ශ්රී ලංකා තානාපති නිලූක කඳුරුගමුව මහතා සහ ටර්කිෂ් එයාර්ලයින්ස්හි ප්රධාන විධායක නිලධාරී අහමඩ් ඔල්මුෂ්ටර් මහතා අතර ඉස්තාන්බුල්හි පිහිටි එම ගුවන් සේවා මූලස්ථානයේදී මෙම සාකච්ඡාව සිදුවිය.
මැදපෙරදිග පවතින අභියෝගාත්මක තත්ත්වයන් මධ්යයේ වුවද, ඉස්තාන්බුල් සහ කොළඹ අතර අඛණ්ඩව ගුවන් ගමන් පවත්වාගෙන යෑමට ටර්කිෂ් එයාර්ලයින්ස් ගත් පියවර ශ්රී ලංකා තානාපතිවරයාගේ ඇගයීමට ලක්විය. ශ්රී ලංකාවට බටහිර අර්ධගෝලය සමඟ සබඳතා පවත්වා ගැනීමට එම සේවාව විශාල පිටිවහලක් වී ඇති බව ඔහු පෙන්වා දුන්නේය.
මෙම සාකච්ඡාවේදී අවධානය යොමු වූ ප්රධාන කරුණු කිහිපයක් පහත දැක්වේ:
ටර්කිෂ් එයාර්ලයින්ස් සතු පුළුල් ගෝලීය ජාලය භාවිත කරමින් ශ්රී ලංකාවට පැමිණෙන සංචාරකයන් සංඛ්යාව ඉහළ නැංවීමට ඒකාබද්ධ වැඩසටහන් ක්රියාත්මක කිරීමට තීරණය කෙරිණි. මීට අමතරව දෙරටේ සංචාරක බලධාරීන් සමඟ එක්ව ඒකාබද්ධ අලෙවිකරණ ව්යාපාර, මාධ්ය සහ සංචාරක නියෝජිතයන් සඳහා වන විශේෂ චාරිකා සංවිධානය කිරීමට ද සාකච්ඡා විය.
ද්විපාර්ශ්වික වෙළෙඳාමට සහය වීම සඳහා ගුවන් භාණ්ඩ ප්රවාහන (Cargo) ධාරිතාව පුළුල් කිරීම සහ මගී ප්රවාහන ගුවන් ගමන් වාර සංඛ්යාව වැඩි කිරීමට පියවර ගැනීමට අවධානය යොමුවිය. ශ්රී ලංකාවේ ගුවන් සේවා ක්ෂේත්රය සමඟ සමීප සහයෝගිතාවකින් කටයුතු කිරීමට ද ටර්කිෂ් එයාර්ලයින්ස් බලධාරීන් සහතික විය.
තම ගුවන් යානා බළඇණියට නව යානා එක්වීමත් සමඟ ශ්රී ලංකාව සමඟ පවතින ගුවන් සබඳතා තවදුරටත් ශක්තිමත් කරන බව ටර්කිෂ් එයාර්ලයින්ස් බලධාරීන් මෙහිදී අවධාරණය කළහ.
මෙම අවස්ථාවට තානාපති කාර්යාලයේ වාණිජ අංශයේ පළමු ලේකම් දිලංග හෙට්ටිආරච්චි සහ ඉස්තාන්බුල්හි ශ්රී ලංකා ගෞරව කොන්සල් ආචාර්ය අයිඩින් ඔසූ මහත්වරුන් ද සහභාගි වූහ.
