ශ්රී ලංකාවේ සෞඛ්ය පද්ධතියට අවශ්ය තාක්ෂණික හා මූල්ය සහයෝගය ලබා දීමට එක්සත් රාජධානියේ මෙරට වෙළෙඳ නියෝජිත එවර්ටන්හි හැනට් සාමිවරයා (Lord Hannett of Everton) එකඟතාව පළ කර තිබේ. සෞඛ්ය නියෝජ්ය අමාත්ය වෛද්ය හංසක විජේමුණි මහතා සහ හැනට් සාමිවරයා අතර සෞඛ්ය හා ජනමාධ්ය අමාත්යාංශයේදී පැවති විශේෂ හමුවකදී මෙම එකඟතාව ඇති විය. මෙම අවස්ථාවට ශ්රී ලංකාවේ බ්රිතාන්ය මහ කොමසාරිස් ඇන්ඩෲ පැට්රික් මහතා ද එක්ව සිටියේය.
සාකච්ඡාවේදී මෙරට සෞඛ්ය ක්ෂේත්රයේ සංවර්ධන ව්යාපෘති, රජයේ රෝහල් පද්ධතියට නවීන වෛද්ය උපකරණ ස්ථාපිත කිරීම සහ සෞඛ්ය සේවාව ඩිජිටල්කරණය කිරීම වැනි කරුණු කෙරෙහි විශේෂ අවධානය යොමු විය.
සෞඛ්ය නියෝජ්ය අමාත්යවරයා මෙරට සෞඛ්ය සේවාව මුහුණ දෙන අභියෝග, විශේෂයෙන්ම බෝවන සහ බෝනොවන රෝග පාලනය සහ තාක්ෂණික මූල්ය ගැටලු පිළිබඳව හැනට් සාමිවරයාව දැනුවත් කළේය. එසේම, ප්රාථමික සෞඛ්ය සත්කාරක සේවා සවිබල ගැන්වීමේ අරමුණින් දිවයින පුරා ස්ථාපිත කෙරෙන ‘ආරෝග්යා’ මධ්යස්ථාන ජාලය ශක්තිමත් කිරීම පිළිබඳව ද රජයේ සැලසුම් මෙහිදී පැහැදිලි කෙරිණි.
වත්මන් රජය ගෙන යන ජනතාවාදී වැඩපිළිවෙළ ඇගයීමට ලක් කළ හැනට් සාමිවරයා, එක්සත් රාජධානියේ දියුණු සෞඛ්ය පද්ධතියේ අත්දැකීම් ශ්රී ලංකාව සමඟ බෙදා ගැනීමටත්, දෙරට අතර සෞඛ්ය ක්ෂේත්රයේ සහයෝගිතාව ශක්තිමත් කිරීමට අවශ්ය සහාය ලබා දීමටත් පොරොන්දු විය.
සෞඛ්ය නියෝජ්ය අමාත්යවරයා රාජකාරි ආරම්භ කිරීමෙන් පසු හැනට් සාමිවරයා සමඟ පැවැත්වූ පළමු නිල හමුව මෙය වන අතර, ශ්රී ලංකාවේ බ්රිතාන්ය මහ කොමසාරිස් කාර්යාලයේ වෙළෙඳ සහ ආයෝජන ප්රධානී අසන්ති ප්රනාන්දු ඇතුළු නිලධාරීන් පිරිසක් ද මෙම අවස්ථාවට සහභාගි වූහ.
