පෞද්ගලික රූපවාහිනී නාලිකාවක ක්රියාකලාපය සම්බන්ධයෙන් ලැබී ඇති පැමිණිල්ලක් පිළිබඳව සෞඛ්ය හා ජනමාධ්ය අමාත්ය, කැබිනට් ප්රකාශක වෛද්ය නලින්ද ජයතිස්ස මහතා අප්රේල් 21 පැවැති කැබිනට් තීරණ දැනුම් දීමේ මාධ්ය හමුවේදී අදහස් දැක්වීය.
යම් රූපවාහිනී නාලිකාවක් විසින් සිදුකරන ලදැයි කියන අගතිගාමී ප්රකාශයක් හෝ වාර්තාකරණයක් සම්බන්ධයෙන් රජයට පැමිණිල්ලක් ලැබී ඇති බවත්, ඒ පිළිබඳව සොයා බැලීම ජනමාධ්ය අමාත්යාංශයේ වගකීමක් බවත් අමාත්යවරයා සඳහන් කළේය.
වත්මන් රජය මාධ්ය නිදහස උපරිමයෙන් සුරැකීමට කැපවී සිටින අතරම, මාධ්ය ආයතන සතු සමාජ වගකීම සහ ආචාරධර්ම ආරක්ෂා කිරීමේ වැදගත්කම ද මෙහිදී අවධාරණය කෙරිණි. කිසිදු මාධ්ය ආයතනයකට එරෙහිව දේශපාලන දඩයම් සිදු නොකරන නමුත්, නීතිමය රාමුව උල්ලංඝනය වන අවස්ථාවලදී අදාළ ආයතන හරහා සොයා බැලීම් සිදුකරන බව ඔහු පැවසීය.
එවැනි පැමිණිලි සම්බන්ධයෙන් ක්රියා කිරීමේදී හුදෙක් දඬුවම් දීමට වඩා, නිවැරදි මාධ්ය සම්ප්රදායන් පවත්වාගෙන යාමට අවශ්ය මඟපෙන්වීම සහ නියාමන ක්රමවේදයක් සකස් කිරීම රජයේ අපේක්ෂාව බව අමාත්යවරයා වැඩිදුරටත් කියා සිටියේය.
