ශ්‍රී ලංකාවේ තාක්ෂණික හා වෘත්තීය අධ්‍යාපන හා පුහුණු (TVET) ක්ෂේත්‍රය තවදුරටත් ශක්තිමත් කිරීම සඳහා ඉදිරි සහයෝගීතා සහ ආයෝජන අවස්ථා පිළිබඳ සාකච්ඡාවක් අග්‍රාමාත්‍ය ආචාර්ය හරිනි අමරසූරිය මහත්මිය සහ එක්සත් අරාබි එමීර් රාජ්‍යයේ ඉහළ පෙළේ නියෝජිත පිරිසක් අතර පාර්ලිමේන්තු සංකීර්ණයේදී පවත්වා තිබේ.
දේශීය හා විදේශීය රැකියා වෙළඳපොළේ ඉල්ලුමට ගැළපෙන කුසලතා සහිත ශ්‍රම බලකායක් බිහිකිරීම සම්බන්ධයෙන් මෙහිදී අවධානය යොමු වී තිබේ. අධ්‍යාපන ප්‍රතිසංස්කරණ යටතේ වෘත්තීය අධ්‍යාපන මාර්ගයක් හඳුන්වාදීමට රජය කටයුතු කරමින් සිටින බවද අග්‍රාමාත්‍යවරිය සඳහන් කර ඇත.
නවීන තාක්ෂණය සහ කර්මාන්ත ක්ෂේත්‍රයේ අවශ්‍යතා සමඟ ගැළපෙන පරිදි තාක්ෂණික හා වෘත්තීය අධ්‍යාපනය යාවත්කාලීන කිරීමටත්, තරුණ පරපුරට දේශීය මෙන්ම විදේශීය රැකියා අවස්ථා සඳහා අවශ්‍ය කුසලතා ලබාදීමටත් රජය අවධානය යොමු කර ඇති බව ඇය පෙන්වා දී තිබේ.
එම වැඩපිළිවෙළ සම්බන්ධයෙන් UAE නියෝජිත පිරිස අවධානය යොමු කර ඇති අතර, ශ්‍රී ලංකාවේ වෘත්තීය අධ්‍යාපන ක්ෂේත්‍රයේ සංවර්ධනය සඳහා ආයෝජන සහ සහයෝගීතා අවස්ථා සම්බන්ධයෙන්ද සාකච්ඡා කර තිබේ. දෙරට අතර කුසලතා සංවර්ධනය, පුහුණු ශ්‍රමිකයන් සඳහා රැකියා අවස්ථා පුළුල් කිරීම සහ අනාගත ආයෝජන සහයෝගීතා ගොඩනැගීම පිළිබඳවද අදහස් හුවමාරු වී ඇත.
ශ්‍රී ලංකා රජයේ නිල මූලාශ්‍ර අනුවද, වෘත්තීය හා තාක්ෂණික අධ්‍යාපනය ජාතික අධ්‍යාපන පද්ධතිය තුළ සමාන වටිනාකමක් ඇති මාර්ගයක් ලෙස ශක්තිමත් කිරීම රජයේ අරමුණක් වන අතර, කුසලතා සංවර්ධනය හා රැකියා අවස්ථා සමඟ TVET ක්ෂේත්‍රය සම්බන්ධ කිරීම පිළිබඳව අග්‍රාමාත්‍යවරිය මීට පෙරද අවධාරණය කර තිබේ.
