සුළි කුණාටුවෙන් පීඩාවට පත් ජනතාවට සහාය ලබාදීම සඳහා ක්රියාත්මක කළ එක්සත් ජාතීන්ගේ මානුෂීය ප්රමුඛතා සැලැස්ම (HPP) අද (11) කොළඹදී නිල වශයෙන් අවසන් කෙරිණි. මෙම විශේෂ සමාප්ති උත්සවය සඳහා අත්යවශ්ය සේවා කොමසාරිස් ජනරාල් හා ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති මහතා සහ ශ්රී ලංකාවේ එක්සත් ජාතීන්ගේ නේවාසික සම්බන්ධීකාරක මාක්-ඇන්ඩ්රේ ෆ්රැන්චේ (Marc-André Franche) මහතා ඇතුළු රාජ්ය සහ ජාත්යන්තර නිලධාරීන් පිරිසක් එක්ව සිටියහ.
මෙහිදී අදහස් දැක්වූ නිලධාරීන් පෙන්වා දුන්නේ ශක්තිමත් රාජ්ය නායකත්වය සහ ජාත්යන්තර හවුල්කාරිත්වය මනාව ඒකාබද්ධ වීම හේතුවෙන් මෙම දැවැන්ත සහන වැඩසටහන ඉතා සාර්ථකව ක්රියාත්මක කිරීමට හැකි වූ බවයි. මෙම මානුෂීය සැලැස්ම යටතේ ඇමෙරිකානු ඩොලර් මිලියන 35.4ක අරමුදල් රැස් කිරීමේ ඉලක්කයක් පැවති අතර, ඉන් සියයට 75ක්ම මේ වන විට සපුරා ගැනීමට සමත්ව ඇත. එමඟින් දිස්ත්රික්ක 25ම ආවරණය වන පරිදි පීඩාවට පත් පුද්ගලයන් 575,000කට ආසන්න පිරිසකට සෘජු ප්රතිලාභ සැලසීමට පියවර ගෙන තිබේ.
මෙම සහන වැඩපිළිවෙළ යටතේ බලපෑමට ලක් වූ පවුල් සඳහා රුපියල් 27,000ක සෘජු දීමනාවක්, තාවකාලික නිවාස ආධාර සහ අනෙකුත් අත්යවශ්ය සහන සේවාවන් රැසක් ලබාදී ඇත. එලෙසම, අනාගතයේදී ඇති විය හැකි ස්වාභාවික විපත්වලින් සිදුවන හානිය අවම කරගැනීම සහ රටේ සූදානම ඉහළ නැංවීම වෙනුවෙන් බහු-උපද්රව පූර්ව අනතුරු ඇඟවීමේ පද්ධති (Multi-hazard Early Warning Systems) සහ අදාළ ආයතනික සම්බන්ධීකරණය තවදුරටත් ශක්තිමත් කරන බව ද මෙහිදී විශේෂයෙන් අවධාරණය කෙරිණි.
