ශ්රී ලංකාව සහ වියට්නාමය අතර ඒකාබද්ධව නව සංචාරක පැකේජයක් හඳුන්වාදීමට සැලසුම් කර ඇති බව විදේශ කටයුතු, විදේශ රැකියා හා සංචාරක අමාත්යාංශය පවසයි. කොළඹ සහ හෝ චි මිං නගරය අතර ඍජු ගුවන් ගමන් සේවා ආරම්භ කිරීම සම්බන්ධයෙන් නිවේදනයක් නිකුත් කරමින් එම අමාත්යාංශය මේ බව සඳහන් කළේය. අදාළ පැකේජය හරහා දෙරටේ පවතින ආගමික සහ සංස්කෘතික සබඳතා මූලික කරගනිමින් ආගමික සංචාරකත්වය ප්රවර්ධනය කිරීමටත්, සංස්කෘතික, සෞඛ්ය මෙන්ම වික්රමාන්විත සංචාරක ක්ෂේත්රයන් දියුණු කිරීමටත් විශේෂ අවධානයක් යොමු කිරීමට නියමිතව ඇත.
වියට්නාමයේ ප්රමුඛතම ගුවන් සේවය වන වියට්ජෙට් (VietJet), කොළඹ සහ හෝ චි මිං නගරය අතර සිය කුළුඳුල් ඍජු ගුවන් ගමන් සේවාව ඊයේ (18) දින නිල වශයෙන් ආරම්භ කරන ලදී. මෙම අවස්ථාවට එක්වූ විෂය භාර අමාත්ය විජිත හේරත් මහතා, වියට්ජෙට් ගුවන් සේවය ශ්රී ලංකාව වෙත පැමිණීම උණුසුම් ලෙස පිළිගත් අතර ඔවුන්ගේ නව මෙහෙයුම් කටයුතු සාර්ථක කර ගැනීම සඳහා සිය සුබ පැතුම් ද පිරිනැමීය. මෙම ඍජු ගුවන් ගමන් සේවාව ආරම්භ වීම, පසුගිය වසරේ ශ්රී ලංකාවේ සහ වියට්නාමයේ රාජ්ය නායකයින් අතර පැවති සාකච්ඡාවල සාර්ථක ප්රතිඵලයක් ලෙස සිදුවූවක් බව ද අමාත්යවරයා මෙහිදී පෙන්වා දුන්නේය.
වියට්ජෙට් ගුවන් සේවය සතියේ අඟහරුවාදා, බ්රහස්පතින්දා සහ සෙනසුරාදා යන දිනවල කොළඹ සහ හෝ චි මිං නගරය අතර ගුවන් ගමන් ක්රියාත්මක කිරීමට කටයුතු යොදා ඇත. හෝ චි මිං නගරය වියට්ජෙට්හි ප්රධාන ගුවන් මධ්යස්ථානයක් වන බැවින්, ශ්රී ලාංකික සංචාරකයින්ට වියට්නාමයේ අනෙකුත් නගර වෙත මෙන්ම නැගෙනහිර ආසියාව, ගිනිකොනදිග ආසියාව, ඕස්ට්රේලියාව ඇතුළු ගමනාන්ත රැසක් වෙත පහසුවෙන් ගමන් කිරීමට මේ හරහා අවස්ථාව සැලසේ. මෙම නව ගුවන් සේවාව සහ සංචාරක ප්රවර්ධන වැඩපිළිවෙළ හේතුවෙන් ඉදිරි කාලසීමාව තුළ ද්විපාර්ශ්වික වෙළඳ හා සංචාරක සබඳතා තවදුරටත් ශක්තිමත් වනු ඇති බව ආර්ථික හා තාන්ත්රික විශ්ලේෂකයෝ පෙන්වා දෙති.
