ස්වාධීන කොමිෂන් සභාවක් ලෙස ස්ථාපිත කර ඇති ‘කාන්තාවන් පිළිබඳ ජාතික කොමිෂන් සභාව’ ස්වාධීනව සහ ශක්තිමත්ව පවත්වාගෙන යාම සඳහා ශ්රී ලංකා පාර්ලිමේන්තුවෙන් ලබා දිය හැකි උපරිම සහයෝගය ලබා දෙන බව කථානායක වෛද්ය ජගත් වික්රමරත්න මහතා ප්රකාශ කළේය.
එම කොමිසමේ සභාපතිනි ග්රේස් ආශිර්වාදම් මහත්මිය ඇතුළු අභිනව සාමාජිකයින් ඊයේ (23) පාර්ලිමේන්තු පරිශ්රයේදී කථානායකවරයා හමුවූ අවස්ථාවේදී ඔහු මේ බව සඳහන් කළේය. දසවැනි පාර්ලිමේන්තුව විසින් ප්රථම වරට ශ්රී ලංකාවේ ස්ථාපිත කරන ලද මෙම ස්වාධීන කොමිෂන් සභාවේ නව සාමාජිකයින් වෙත කථානායකවරයා සිය උණුසුම් සුබ පැතුම් එක් කළේය.
ශ්රී ලංකාවේ ජනගහනයෙන් 51%ක ප්රතිශතයක් නියෝජනය කරන කාන්තාවන් වෙනුවෙන් ඉතා භාරදූර කාර්යභාරයක් මෙම කොමිසමට පැවරී ඇති බව පෙන්වා දුන් කථානායකවරයා, ලෝකයේ ප්රථම අග්රාමාත්යවරිය බිහි කළ රටක් ලෙස ශ්රී ලාංකේය කාන්තාව දකුණු ආසියාවේ අනෙකුත් රටවලට සාපේක්ෂව සමාජීය වශයෙන් ඉදිරියෙන් සිටින බව සිහිපත් කළේය. එම නිසා කාන්තාවන් සවිබල ගැන්වීම උදෙසා නිවැරදි සහ ස්වාධීන තීන්දු තීරණ ගැනීමට කොමිෂන් සභාව කටයුතු කළ යුතු බව ද ඔහු අවධාරණය කළේය.
මෙම හමුවේදී කොමිෂන් සභාවේ පවතින පරිපාලනමය ගැටලු සහ යටිතල පහසුකම් සංවර්ධනය සම්බන්ධයෙන් දෙපාර්ශවය අතර දීර්ඝ වශයෙන් සාකච්ඡා කෙරිණි.
මෙම අවස්ථාව සඳහා පාර්ලිමේන්තුවේ මහ ලේකම් කුෂානි රෝහණදීර මහත්මිය ඇතුළු පාර්ලිමේන්තු නිලධාරීන් සහ කාන්තාවන් පිළිබඳ ජාතික කොමිෂන් සභාවේ සාමාජිකයින් වන කේ.ඩී.ආර්. ඔල්ගා, ශ්රීන් සාරූර්, ජනහා සෙල්වාරස්, ජයන්ති උත්පලා, වෛද්ය පද්මා ගුණරත්න සහ ආචාර්ය කලන සේනාරත්න යන මහත්ම මහත්මීහු සහභාගී වූහ.
