චීනයේ හොංකොංහිදී පැවති 22 වැනි ආසියානු කනිෂ්ඨ මළළ ක්‍රීඩා තරගාවලියේදී විශිෂ්ට දක්ෂතා දැක්වූ ශ්‍රී ලංකා ක්‍රීඩක ක්‍රීඩිකාවන් අද (02) අලුයම කටුනායක බණ්ඩාරනායක ජාත්‍යන්තර ගුවන් තොටුපොළ වෙත පැමිණියහ. මෙම තරගාවලියේදී ශ්‍රී ලංකාව රන් පදක්කම් 02ක්, රිදී පදක්කම් 02ක් සහ ලෝකඩ පදක්කම් 04ක් ඇතුළුව පදක්කම් 8ක් දිනා ගනිමින්, සමස්ත පදක්කම් සටහනේ 08 වැනි ස්ථානය හිමි කර ගැනීමට සමත් විය.
තරුෂි අභිෂේකා මීටර් 1,500 ධාවන ඉසව්වෙන් රන් පදක්කමක් සහ මීටර් 800 ධාවන ඉසව්වෙන් ලෝකඩ පදක්කමක් දිනා ගත්තාය. මීටර් 200 ඉසව්වෙන් වසර 32කට පසු ශ්‍රී ලංකාවට රන් පදක්කමක් දිනා දෙමින් රන්සිනි පෙරේරා ඉතිහාසයට එක්විය. එමෙන්ම තරූෂ මෙන්ඩිස් උස පැනීමේ ඉසව්වෙන් රිදී පදක්කම දිනා ගත් අතර, නෙත්සර දිනෙත් මීටර් 800 ධාවන ඉසව්වෙන් රිදී පදක්කම දිනා ගත්තේය.
මීට අමතරව සදෙව් රාජකරුණා මීටර් 200 ඉසව්වෙන් සහ මිහින්සා අබේරත්න කාන්තා උස පැනීමේ ඉසව්වෙන් ලෝකඩ පදක්කම් දිනා ගත්හ. මීටර් 400 × 4 මිශ්‍ර සහාය දිවීමේ කණ්ඩායම ද ලෝකඩ පදක්කම දිනා ගැනීමට සමත් විය.
ශ්‍රී ලන්කන් ගුවන් සේවයේ යූ.එල්.-885 දරන ගුවන් යානයෙන් අද උදෑසන 6.10ට පැමිණි මෙම පිරිස පිළිගැනීම සඳහා ක්‍රීඩා අමාත්‍යාංශයේ සහ ශ්‍රී ලංකා මළළ ක්‍රීඩා සංගමයේ නිලධාරීන්, ඔවුන්ගේ පාසල්වල විදුහල්පතිවරුන්, ගුරුවරුන් සහ දෙමාපියන් විශාල පිරිසක් ගුවන් තොටුපොළ වෙත පැමිණ සිටියහ.
