2025-2026 ශ්රී පාද වන්දනා සමය නිමා කිරීම සම්බන්ධයෙන් රාජ්ය නිලධාරීන් දැනුවත් කිරීම සඳහා නල්ලතන්නිය ග්රාමසේවා කාර්යාලයේ පැවති විශේෂ රැස්වීමේදී ශ්රී පාදස්ථානාධිපති පූජ්ය බෙන්ගමුවේ ශ්රී ධම්මදින්න නා හිමියන් විසින් මෙම සුවිශේෂී ප්රකාශය සිදු කරන ලදී. ශ්රී පාදය කේන්ද්ර කර ගනිමින් කේබල් කාර් පද්ධතියක් ඉදි කිරීමට රජය සැලසුම් කර ඇති බවත් ඒ සඳහා තම ආශිර්වාදය හිමිවන බවත් උන්වහන්සේ මෙහිදී අවධාරණය කළහ. කෙසේ වෙතත් මෙම කේබල් කාර් පද්ධතිය හැරමිටි පහණ දක්වා පමණක් සීමා විය යුතු බව උන්වහන්සේ රජයට වැඩිදුරටත් දැනුම් දී සිටියහ.
එමෙන්ම 2025-2026 ශ්රී පාද වන්දනා සමය එළඹෙන මැයි මස 31 වන දිනෙන් නිල වශයෙන් අවසන් වන බව ද උන්වහන්සේ මෙහිදී ප්රකාශ කළහ. වෙසක් පොහොයට පසු දින එනම් මැයි 31 වනදා ශ්රී පාද උඩ මළුවේ තැන්පත් කර ඇති සධාතුක කරඬුව සහ සමන් දේව ප්රතිමාවන් පෙරහැර සතරකින් පැල්මඩුල්ල ශ්රී පාද රජමහා විහාරස්ථානය දක්වා වැඩම කරවීමට සියලු කටයුතු සූදානම් කර ඇත. එතැන් සිට ශ්රී පාද අවාරය අවසන් වන තෙක් එම පූජනීය වස්තූන් ගල්පොත්තාවල ශ්රී පාද රජමහා විහාරස්ථානයේ තැන්පත් කර තැබෙනු ඇත.
මෙවර වන්දනා සමය තුළ පරිසරයට මුදා හරින ලද ප්ලාස්ටික් අපද්රව්ය ප්රමාණය සැලකිය යුතු ලෙස අවම වී ඇති බවත් වන්දනාකරුවන්ට අවශ්ය පානීය ජල පහසුකම් සලසා දීම මෙයට ප්රධාන හේතුව වී ඇති බවත් රැස්වීමේදී අනාවරණය විය. ඉදිරි වන්දනා සමයේදී එම ජල යෝජනා ක්රමය ශ්රී පාද උඩමළුව දක්වාම ව්යාප්ත කිරීමට සැලසුම් කර ඇති බව ද මෙහිදී ප්රකාශ විය. මෙම අවස්ථාවට නුවරඑළිය දිස්ත්රික් ලේකම් තුෂාරි තෙන්නකෝන් මහත්මිය ඇතුළු රාජ්ය සහ පෞද්ගලික අංශයේ නිලධාරීන් රැසක් සහභාගී වී සිටියහ.
