ශ්රී ලංකන් ගුවන් සේවයේ සිදුවූ බව කියන ආන්දෝලනාත්මක ඒයාර්බස් ගනුදෙනුවට අදාළව, එහි සැකකරුවන් දෙදෙනෙකු වහාම අත්අඩංගුවට ගෙන අධිකරණයට ඉදිරිපත් කරන ලෙස කොටුව මහේස්ත්රාත් ඉසුරු නෙත්තිකුමාර මහතා අද (22) අපරාධ පරීක්ෂණ දෙපාර්තමේන්තුවට (CID) නියෝග කළේය.
මෙම නඩුවේ දෙවන සැකකාරිය ලෙස නම් කර ඇති, ශ්රී ලන්කන් ගුවන් සේවයේ හිටපු විධායක නිලධාරී කපිල චන්ද්රසේන මහතාගේ බිරිඳ වහාම අත්අඩංගුවට ගන්නා ලෙස මෙහිදී නියෝග කෙරිණි. ඇයට ජීවිත තර්ජන ඇති බවට විත්තිය ඉදිරිපත් කළ කරුණු ප්රතික්ෂේප කළ මහේස්ත්රාත්වරයා, ඇයට තවදුරටත් ඕස්ට්රේලියාවේ රැඳී සිටීමට ඉඩ නොතබා රජය මැදිහත් වී ඇය මෙරටට ගෙන්වා ගැනීමට අවශ්ය පියවර ගත යුතු බව අවධාරණය කළේය.
මීට අමතරව, නඩුවේ තුන්වන සැකකරු වන හිටපු කතානායක චමල් රාජපක්ෂ මහතාගේ පුත්රයෙකු වන ශමින්ද්ර පුන්සිරි රාජපක්ෂ මහතා ද අත්අඩංගුවට ගෙන ඉදිරි දිනකදී අධිකරණයට ඉදිරිපත් කිරීමට පියවර ගන්නා ලෙස මහේස්ත්රාත්වරයා නියෝග කළේය. ඔහුට එරෙහිව නිකුත් කර ඇති රතු වරෙන්තු ක්රියාත්මක කිරීමේදී සිදුව ඇති ප්රමාදයන් පිළිබඳව මෙහිදී අධිකරණයේ දැඩි අවධානය යොමු වූ අතර, එම ප්රමාදයන් වළක්වා වහාම සැකකරු අත්අඩංගුවට ගැනීමට කටයුතු කරන ලෙස අපරාධ පරීක්ෂණ දෙපාර්තමේන්තුවට දැනුම් දෙන ලදී.
වසර ගණනාවක් තිස්සේ ඇදී යන මෙම දූෂණ විමර්ශනයට අදාළව ජාත්යන්තර මට්ටමින් සැකකරුවන් අත්අඩංගුවට ගැනීමට ගෙන ඇති මෙම තීරණය, පාස්කු ප්රහාරය ඇතුළු අනෙකුත් මහා පරිමාණ විමර්ශන කඩිනම් කරන ලෙස සිවිල් සහ ආගමික නායකයන් ඉල්ලා සිටින පසුබිමක විශේෂ වැදගත්කමක් ගනී.
