ශ්රී ලංකන් ගුවන් සමාගම වෙනුවෙන් 2013 වසරේදී ගුවන් යානා 10ක් මිලදී ගැනීමේ ගනුදෙනුවේදී ලැබුණු බව කියන ඇමෙරිකානු ඩොලර් ලක්ෂ 20ක අල්ලස් මුදල්, හිටපු ජනාධිපති මහින්ද රාජපක්ෂ මහතාගේ 2015 ජනාධිපතිවරණ මැතිවරණ ව්යාපාරය සඳහා යොමු කර ඇති බව අල්ලස් කොමිසම ඊයේ (05) කොළඹ මහේස්ත්රාත් අධිකරණය හමුවේ අනාවරණය කළේය.
සිංගප්පූරුවේ ‘බිස් සොලියුෂන්’ ආයතනය මගින් ස්ටෑන්ඩර්ඩ් චාර්ටඩ් බැංකුව හරහා ලංකාවේ ‘ඇමෝ’ (Ammo) නැමැති ආයතනයට මෙම මුදල් එවා ඇති බවත්, ඒවා චෙක්පත් මගින් ලබාගෙන ඇති බවත් හෙළි වී තිබේ.
අදාළ මුදල්වලින් රුපියල් මිලියන 95ක් 2015 ජනාධිපතිවරණ ප්රචාරණ කටයුතු සඳහා වැය කර ඇති අතර, එම කටයුතු හිටපු ආණ්ඩුකාර විලී ගමගේ සහ පියංකර ජයරත්න යන මහත්වරුන්ගේ ප්රධානත්වයෙන් සිදු කර ඇත.
සැකකාර කපිල චන්ද්රසේනගේ බැංකු ගිණුම්වල මුල් ලේඛන සියල්ල පරීක්ෂණ සඳහා අල්ලස් කොමිසම භාරයට ගෙන තිබේ.
මෙම සිද්ධිය සම්බන්ධයෙන් හිටපු ජනාධිපති මහින්ද රාජපක්ෂ, පියංකර ජයරත්න සහ විලී ගමගේ යන මහත්වරුන්ගෙන් ප්රකාශ ලබා ගැනීමට නියමිතය. විමර්ශන මගහරිමින් සිටින සෙසු සැකකරුවන් වන කපිල චන්ද්රසේනගේ බිරිඳ, විජේනායක සහ ශමින්ද පුන්සිරි යන අය අත්අඩංගුවට ගැනීමට ජාත්යන්තර පොලිසිය හරහා ‘රතු නිවේදන’ නිකුත් කිරීමට කටයුතු කරන බවද කොමිසම පැවසීය.
කරුණු සලකා බැලූ ප්රධාන මහේස්ත්රාත්වරයා, රක්ෂිත බන්ධනාගාරගත කර සිටි කපිල චන්ද්රසේන මහතා රුපියල් ලක්ෂ 02ක මුදල් ඇපයක් සහ රුපියල් ලක්ෂ 100 බැගින් වූ ශරීර ඇප දෙකක් මත මුදා හැරීමට නියෝග කළේය. සැකකරුට විදේශ ගමන් තහනමක් පැනවූ අධිකරණය, නඩුවේ වැඩිදුර ප්රගතිය ලබන ජූලි මස 14 වැනිදා වාර්තා කරන ලෙස නියම කළේය.
