සියලුම ක්‍රීඩාවල පුහුණුවීම් කටයුතු යළි ආරම්භ කිරීමට පියවර
සෞඛ්‍යාරක්ෂිත ක්‍රමවේද අනුව සියලුම ක්‍රීඩාවල පුහුණු කටයුතු ආරම්භ කිරීමට අවසර ලබා දෙන බව සෞඛ්‍ය අමාත්‍යංශය පවසයි.
ඒ සම්බන්ධයෙන් වු සාකච්ඡාවක් ඊයෙ (05) දින සෞඛ්‍ය අමාත්‍යාංශයේදී පැවැත්විණි.
කොවිඩ් 19 වසංගත තත්ත්වය යටතේ වුවද ව්‍යායාම සහ ක්‍රීඩාව නැවත ආරම්භ කිරීමේ වැදගත්කම එහිදී සාකච්ඡා විය. රට තුළ පවතින තත්ත්වය සහ ප්‍රාදේශීය වශයෙන් පවතින තත්ත්වයන් සලකා බලමින් පියවරෙන් පියවර ආරක්ෂාකාරීව ක්රීඩා කටයුතු ආරම්භ කිරීමට සාකච්ඡාවට එක් වූ සියළුදෙනාම එකඟත්වය පළ කළේය.
තනි තනිව කරන ක්රීඩා සහ අවදානම් තත්ත්වය අඩු ක්රීඩා සඳහා තරගාවලි පැවැත්වීමට තීරණය කළ අතර, සෞඛ්‍යාරක්ෂිත ක්‍රමවේද අනුව ක්රීඩා කටයුතු පවත්වාගෙන යාමට හැකියාව ලැබුණහොත් වැඩි අවදානමක් සහිත ක්රීඩා සහ ඒවායේ තරගාවලි පැවැත්වීමට ඇති හැකියාව පිළිබඳව මසකට පසු නැවත සමාලෝචනය කිරීමෙන් අනතුරුව තීරණයක් ගන්නා බවත් මෙහිදී සාකච්ඡා විය. එසේම බස්නාහිර පළාත වැනි වැඩි අවදානමක් සහිත පළාත් සහ දැනට කොවිඩ් 19 වසංගත රෝග තත්ත්වය පැතිරී ඇති ස්ථාන හැර අනෙකුත් ප්‍රදේශවල ක්රීඩා කටයුතු නැවත ආරම්භ කිරීමට තීරණය විය.
ක්රීඩා කටයුතු පවත්වාගෙන යාමේ දී දෙමාපියන්ට, පාසල් ගුරුවරුන්ට සහ ක්‍රීඩක ක්‍රීඩිකාවන්ට එක හා සමාන වගකීමක් ඇති බැවින් ඉදිරි දින කිහිපය තුළදී ක්රීඩා කටයුතු ආරක්ෂාකාරීව ආරම්භ කළ යුතු ආකාරය පිළිබඳව නිසි සෞඛ්‍යාරක්ෂිත මාර්ගෝපදේශ මාලාවක් සෞඛ්‍ය අමාත්‍යාංශය, තරුණ හා ක්රීඩා අමාත්‍යාංශය සහ අධ්‍යාපන අමාත්‍යාංශය එක්ව ලබාදීමට නියමිත බවත් එහිදී ප්‍රකාශ විය.
මෙම සාකච්ඡාව තරුණ හා ක්රීඩා අමාත්‍ය නාමල් රාජපක්ෂ, සෞඛ්‍ය ඇමතිනී පවිත්‍රා වන්නිආරච්චි, ග්‍රාමීය හා පාසල් ක්රීඩා යටිතල පහසුකම් ප්රවර්ධන රාජ්‍ය අමාත්‍ය තේනුක විදානගමගේ යන අමාත්‍යවරුන්ගේ ප්‍රධානත්වයෙන් පැවති අතර මේ සඳහා සෞඛ්‍ය අමාත්‍යාංශයේ, තරුණ හා ක්රීඩා අමාත්‍යාංශයේ, අධ්‍යාපන අමාත්‍යාංශයේ සහ ජාතික ක්රීඩා කවුන්සිලයේ නිලධාරීන් පිරිසක් ද සහභාගී විය.