වත්මන් අධ්යාපන ක්රමය තුළ දැඩි තරගකාරිත්වයකට සහ ආතතියකට ලක්ව සිටින නව යොවුන් දරුවන්ගේ පෞරුෂය සහ මානසික සුවතාව නංවාලීම අරමුණු කරගනිමින්, පිළියන්දල වෑවල පිහිටි සුබෝධි පූර්ණ අධ්යාපන සහ පුද්ගල සංවර්ධන මධ්යස්ථානය විශේෂ වැඩසටහන් මාලාවක් ක්රියාත්මක කරයි. හුදු පොතපතේ දැනුමෙන් ඔබ්බට ගොස් දරුවාගේ හදවත සහ ආධ්යාත්මය අවදි කරන පරිසරයක් තුළ, ඔවුන්ගේ දැනුම, ආකල්ප සහ කුසලතා සංවර්ධනය කිරීම මෙම වැඩසටහන්වල මූලික අරමුණ වී ඇති බව එම ආයතනය පෙන්වා දෙයි.
වර්ෂ 1981 දී ආචාර්ය ගරු මර්වින් ප්රනාන්දු පියතුමන් විසින් ආරම්භ කරන ලද මෙම ආයතනය, ප්රකට ගෘහ නිර්මාණ ශිල්පී ජෙෆ්රි බාවා මහතාගේ අද්විතීය නිර්මාණයක් ලෙස බොල්ගොඩ වැව ආශ්රිත අක්කර 13ක භූමියක ස්ථාපිත කර ඇත. මනෝවිද්යාව, සමාජ විද්යාව සහ ආධ්යාත්මිකත්වය යන විෂය ක්ෂේත්රවල සංකලනයක් ලෙස ගොඩනැඟී ඇති මෙම මධ්යස්ථානය, නේවාසික වැඩමුළු, යෝගා, භාවනා සහ නායකත්ව පුහුණු වැඩසටහන් හරහා දරුවන්ගේ අභ්යන්තර හිස්බව පුරවාලීමට අවශ්ය ප්රඥාව ලබා දෙන ස්වයං අවබෝධය ලබන තෝතැන්නක් ලෙස ක්රියාත්මක වේ.
අධ්යාපන පද්ධතිය තුළ දරුවන් මුහුණ දෙන වික්ෂිප්ත භාවය සහ කනස්සල්ල පාලනය කරමින් රටට වැඩදායී පුරවැසියන් බිහි කිරීමේ වගකීම භාර ගනිමින්, සුබෝධි ආයතනය තරුණ නායකත්ව පුහුණුව සහ උපදේශන සේවාවන් ඔස්සේ පවුල් සබඳතා ශක්තිමත් කිරීමට ද දායක වේ. දැයේ දරුවන්ගේ මානසික සහ ආධ්යාත්මික සුවතාවය වෙනුවෙන් නිර්මාණය කර ඇති මෙම පූර්ණ අධ්යාපන ක්රමවේදය, වර්තමාන සමාජය තුළ දරුවන්ගේ පෞරුෂ වර්ධනය සඳහා ඉතා වැදගත් සාධකයක් වනු ඇති බව මේ වන විට පවතින සමාජ කතිකාවත මගින් ද තහවුරු කරයි.
