රාජ්‍ය බුද්ධි සේවයේ හිටපු ප්‍රධානී සුරේෂ් සලේ මහතා ජාතික රෝහලෙන් මුදා නොහැරීමට අදාළ වෛද්‍ය වාර්තා නිකුත් කළ වෛද්‍යවරුන් 10 දෙනා සහ කොළඹ ජාතික රෝහලේ අධ්‍යක්ෂවරයා අද (06) පස්වරුවේ කොටුව මහේස්ත්‍රාත් අධිකරණය හමුවේ පෙනී සිටීමට නියමිතය.
පාස්කු ඉරුදින ත්‍රස්ත ප්‍රහාර මාලාව සම්බන්ධයෙන් සැකකරුවෙකු ලෙස නම් කර රඳවා ප්‍රශ්න කරන සුරේෂ් සලේ මහතා මේ වනවිට ජාතික රෝහලේ සාමාන්‍ය වාට්ටුවක නේවාසිකව ප්‍රතිකාර ලබමින් සිටී.
පසුගිය 28 වැනිදා වනවිට ඔහු අපරාධ පරීක්ෂණ දෙපාර්තමේන්තුව වෙත භාරදීමට හැකි බවට රෝහල් අධ්‍යක්ෂවරයා විවෘත අධිකරණයේදී ප්‍රකාශ කර තිබුණද, ඔහු මුදාහැර නොමැති බව අපරාධ පරීක්ෂණ දෙපාර්තමේන්තුව මෝසමක් මගින් අධිකරණයට දැනුම් දී තිබේ.
සලේ මහතා මුදාහැරීමට නොහැකි බව සඳහන් කරමින් පෝෂණවේදීන්, මනෝ වෛද්‍යවරුන් ඇතුළු වෛද්‍යවරුන් 10 දෙනෙකුගෙන් සමන්විත වෛද්‍ය මණ්ඩලයක් විසින් වෛද්‍ය වාර්තාවක් නිකුත් කර ඇති බවද අපරාධ පරීක්ෂණ දෙපාර්තමේන්තුව අධිකරණයට දැනුම් දී ඇත.
ඒ අනුව එම වෛද්‍ය වාර්තාව සම්බන්ධයෙන් කරුණු දැක්වීම සඳහා අධිකරණය හමුවේ පෙනී සිටින ලෙස කොටුව මහේස්ත්‍රාත් පසන් අමරසේන මහතා විසින් නොතීසි නිකුත් කර තිබේ.
