ලොව විශාලතම ස්ටේබල්කොයින් (Stablecoin) නිකුත් කරන්නා වන Tether, බිට්කොයින් පතල් කර්මාන්තයට මූල්ය පහසුකම් සපයන Antalpha වේදිකාවේ 8.2% ක කොටස් හිමිකාරිත්වයක් මිලදී ගනිමින් එහි ප්රධාන කොටස්කරුවෙකු බවට පත්ව තිබේ. ඇමරිකානු සුරැකුම්පත් සහ විනිමය කොමිෂන් සභාව (SEC) වෙත ඉදිරිපත් කළ ලේඛනවලට අනුව Tether සමාගම අනුබද්ධ ආයතන හරහා Antalpha හි කොටස් මිලියන 1.95ක් අත්පත් කර ගෙන ඇත.
බිට්කොයින් ඇපයට තබා ලබාදෙන ණය සහ පතල් උපකරණ සඳහා මූල්ය පහසුකම් සැපයීම Antalpha හි ප්රධාන කාර්යයයි. 2024 වසර අවසන් වන විට එහි ණය කළඹ ඩොලර් බිලියන 1.6ක් පමණ වූ අතර, 2025 වසරේදී එහි ශුද්ධ ලාභය තෙගුණයකින් ඉහළ ගොස් තිබේ. මෙම ආයෝජනය හරහා ඩිජිටල් වත්කම් යටිතල පහසුකම් කෙරෙහි පවතින සෘජු මැදිහත්වීම ඉහළ නැංවීමට Tether බලාපොරොත්තු වේ.
Tether සමාගම සිය ලාභය භාවිතා කරමින් ක්රිප්ටෝ පතල් කර්මාන්තය, කෘතිම බුද්ධිය (AI) සහ ටෝකනයිස් කළ වත්කම් (Tokenised assets) ඇතුළු ක්ෂේත්ර රැසක සිය ආයෝජන ව්යාප්ත කරමින් සිටී. මෑතකදී ඔවුන් Anchorage Digital බැංකුවේ සහ රන් ආශ්රිත ඩිජිටල් වත්කම් ක්ෂේත්රයේ ද විශාල ආයෝජන සිදු කර ඇත.
Tether හි ප්රධාන විධායක නිලධාරී Paolo Ardoino මහතා මීට පෙර සඳහන් කර ඇත්තේ, සමාගම මේ වන විට විවිධ ක්ෂේත්රවල ආයතන 120කට අධික සංඛ්යාවක ආයෝජනය කර ඇති බවයි. වැදගත්ම කරුණ වන්නේ මෙම සියලු ආයෝජන සිදු කරනු ලබන්නේ සමාගමේ ලාභයෙන් මිස ස්ටේබල්කොයින් (USDT) සඳහා පවතින සංචිත (Reserves) භාවිතයෙන් නොවන බවයි.
