OpenAI ආයතනයේ ප්රධාන විධායක නිලධාරී සෑම් ඇල්ට්මන්ගේ සැන් ෆ්රැන්සිස්කෝහි පිහිටි නිවසට ‘මොලොටොව් කොක්ටේල්’ (Molotov cocktail) බෝම්බ ප්රහාරයක් එල්ල කිරීම සම්බන්ධයෙන් 20 හැවිරිදි ටෙක්සාස් ජාතිකයෙකුට මිනීමැරීමට තැත් කිරීම ඇතුළු බරපතළ චෝදනා රැසක් එල්ල කර තිබේ. ඩැනියෙල් මොරෙනෝ-ගාමා නම් මෙම සැකකරු පසුගිය සතියේ මෙම ගිනි තැබීමේ ප්රහාරය එල්ල කර ඇති අතර, ඔහුට එරෙහිව මිනීමැරීමට තැත් කිරීමේ චෝදනා දෙකක් සහ තවත් චෝදනා නවයක් ගොනු කර ඇති බව සැන් ෆ්රැන්සිස්කෝ දිස්ත්රික් නීතිඥ බෲක් ජෙන්කින්ස් ප්රකාශ කළාය.
මෙම සිදුවීම හුදෙක් දේපළ හානියක් නොව සෑම් ඇල්ට්මන්ගේ ජීවිතය නැති කිරීමට ගත් උත්සාහයක් මෙන්ම ඔහු සමඟ සේවය කරන පිරිසටද දැඩි තර්ජනයක් බව බලධාරීහු අවධාරණය කරති. සැකකරුට එරෙහිව පුපුරණ ද්රව්ය භාවිතයෙන් දේපළ විනාශ කිරීමට තැත් කිරීම සහ ලියාපදිංචි නොකළ ගිනි අවියක් ළඟ තබා ගැනීම සම්බන්ධයෙන් ෆෙඩරල් මට්ටමේ නඩුද පවරා තිබේ. අධිකරණය හමුවේ මෙම චෝදනා ඔප්පු වුවහොත් ඔහුට ජීවිතාන්තය දක්වා සිරදඬුවම් නියම වීමේ දැඩි අවදානමක් පවතී.
