ලොව වැඩිම ණය බරක් සහිත දේපළ වෙළඳාම් සමාගම වූ චීන එවර්ග්රෑන්ඩ් (China Evergrande) සමූහයේ නිර්මාතෘ හුයි කා යාන්, අරමුදල් වංචා කිරීම සහ අල්ලස් ලබා දීම ඇතුළු චෝදනාවලට තමන් වරදකරු බව පිළිගෙන තිබේ. වසර තුනක රැඳවුම් භාරයේ සිටීමෙන් අනතුරුව 67 හැවිරිදි හුයි විසින් මෙම පාපොච්චාරණය සිදු කර ඇති අතර, මෙය චීන දේපළ වෙළඳාම් ක්ෂේත්රයේ දැවැන්තම බිඳවැටීමක අවසානය සනිටුහන් කරයි.
2021 වසරේදී චීන කොමියුනිස්ට් පක්ෂයේ සියවස් සැමරුම් උළෙලට පවා ආරාධිතයෙකු ලෙස එක්වෙමින් එරට දේශපාලන හා ව්යාපාරික ප්රභූන් අතර කැපී පෙනුණු හුයි, එකල තම සමාගම මුහුණ දී සිටි දැඩි මූල්ය පීඩනය පිළිබඳව කිසිදු ඉඟියක් පළ කර නොතිබුණි. එහෙත්, වසර පහකට පසු ඔහුගේ ව්යාපාරික අධිරාජ්යය ඇමෙරිකානු ඩොලර් බිලියන 300කට අධික ණය බරක් සමඟ බිඳවැටුණු අතර, එය ෆින්ලන්තයේ සමස්ත දළ දේශීය නිෂ්පාදිතයට (GDP) සමාන අගයකි.
එවර්ග්රෑන්ඩ් සමාගම මේ වන විට ඈවර කිරීමේ (Liquidation) ක්රියාවලියකට යොමු කර ඇති අතර, හුයි කා යාන්ගේ මෙම වරද පිළිගැනීම ගෝලීය ආයෝජකයන්ගේ දැඩි අවධානයට ලක්වූ චීන දේපළ වෙළඳාම් අර්බුදයේ තීරණාත්මක හැරවුම් ලක්ෂයකි. 1996 වසරේ ගුවැන්ෂු නගරයෙන් ආරම්භ වූ මෙම ව්යාපාරික අධිරාජ්යයේ බිඳවැටීම චීන ආර්ථිකයට මෙන්ම ගෝලීය වෙළඳපොළට ද බලපෑම් එල්ල කළ ප්රධාන සිදුවීමක් ලෙස සැලකේ.
