තායිලන්තයේ වාර්ෂිකව පැවැත්වෙන ලෝක ප්රකට ‘ජාත්යන්තර තායි සටන් කලා තරගාවලිය’ (ITMA) ප්රථම වරට ශ්රී ලංකාවේදී පැවැත්වීමට සියලු කටයුතු සූදානම් කර ඇති බව එහි සංවිධායක මණ්ඩලය සඳහන් කරයි. මෙම සුවිශේෂී ජාත්යන්තර තරගාවලිය අද (31) මීගමුව ගෝල්ඩි සෑන්ඩ්ස් (Goldi Sands) හෝටල් පරිශ්රයේදී පැවැත්වෙන අතර, එහි සමාරම්භක උත්සවය අද පස්වරු 5:30ට ආරම්භ වීමට නියමිතය. මෙය ශ්රී ලංකාවේ සටන් කලා ඉතිහාසයේ මෙන්ම ක්රීඩා සංචාරක කර්මාන්තයේ ද සුවිශේෂී කඩඉමක් වනු ඇත. World Muay Thai Organization (WMO), World Muay Boran Federation (WMBF) සහ Universal Boxing Federation (UBF) වැනි ලොව ප්රමුඛතම සටන් කලා පාලක මණ්ඩලවල නිල අධීක්ෂණය යටතේ පැවැත්වෙන මෙම තරගාවලියේ ප්රමිතීන් පාලනය කරනු ලබන්නේ ජාත්යන්තර තාක්ෂණික නිලධාරීන් කණ්ඩායමක් විසිනි. WMO Muaythai Lanka සංවිධානයේ සභාපති දුෂාන්ත පෙරේරා මහතා විසින් මෙම තරගාවලිය සඳහා ශ්රී ලංකා සංචාරක ප්රවර්ධන කාර්යාංශයේ නිල අනුමැතිය ලබාගෙන ඇති අතර, ශ්රී ලංකාවේ තායිලන්ත තානාපති කාර්යාලය සහ Kru Muaythai Association (KMA) ද මීට දායකත්වය දක්වයි. මෙම තරගාවලිය සඳහා රටවල් 15කට අධික සංඛ්යාවකින් ජාත්යන්තර ක්රීඩකයින් 120කට වැඩි පිරිසක් සහභාගී වනු ඇතැයි අපේක්ෂා කෙරේ. මේ වන විටත් රුසියාව, පිලිපීනය, ඔස්ට්රේලියාව, හොංකොං සහ දකුණු කොරියාව යන රටවල් නියෝජනය කරන ක්රීඩක ක්රීඩිකාවන් සහ නිලධාරීන් මීගමුව නගරය වෙත පැමිණ ඇති අතර ඔවුන් ඉතා උණුසුම් අයුරින් පිළිගැනීමට කටයුතු යොදා තිබුණි. මෙම තරඟාවලිය හරහා ආසියානු කලාපීය ක්රීඩා ක්ෂේත්රයේ අලුත් සබඳතා සහ සහයෝගීතාව තවදුරටත් ශක්තිමත් වනු ඇතැයි සංවිධායක මණ්ඩලය බලාපොරොත්තු වේ.
