දින පහක් පුරා ඇදී ගිය දේශපාලන අර්බුදය නිමා කරමින් දකුණු ඉන්දීය සුපිරි තරුවක වන තලපති විජේ තමිල්නාඩු ප්රාන්තයේ නව මහ ඇමතිවරයා ලෙස ඊයේ දිවුරුම් දුන්නේය. චෙන්නායි නුවර ජවහර්ලාල් නේරු ක්රීඩාංගණයේදී දහස් සංඛ්යාත ජනතාවගේ ඔල්වරසන් මැද පැවැති මෙම උත්සවයේදී ඔහු තමිල්නාඩුවේ 9 වැනි මහ ඇමතිවරයා ලෙස ඉතිහාසයට එක්විය. මෙම සුවිශේෂී අවස්ථාවට ඉන්දීය ජාතික කොංග්රසයේ නායක රාහුල් ගාන්ධි මහතා ඇතුළු ජ්යෙෂ්ඨ දේශපාලනඥයන් රැසක් සහභාගී වීම විශේෂත්වයකි.
පසුගියදා පැවැති ප්රාන්ත මැතිවරණයේදී විජේගේ ‘තමිලග වෙට්රි කලහම්’ පක්ෂය ආසන 108ක් ජයග්රහණය කළද, රජයක් පිහිටුවීමට අවශ්ය වූ ආසන 118ක බහුතර බලය ලබා ගැනීමට ඔවුන්ට තවත් ආසන කිහිපයක සහාය අවශ්ය විය. පසුව ඉන්දීය ජාතික කොංග්රසය, ඉන්දීය කොමියුනිස්ට් පක්ෂය සහ ඉන්දීය මුස්ලිම් ලීගය ඇතුළු පක්ෂ කිහිපයක මන්ත්රීවරුන් විජේ වෙත සිය ලිඛිත සහාය පළ කිරීමත් සමඟ මෙම නව රජය පිහිටුවීමට මග විවර විය. විජේ සමඟින් ඔහුගේ පක්ෂයේ තවත් නායකයින් නව දෙනෙකු කැබිනට් අමාත්යවරුන් ලෙස මෙහිදී දිවුරුම් දුන්හ.
මෙම පත්වීම තමිල්නාඩු දේශපාලනයේ සුවිශේෂී සන්ධිස්ථානයක් වන්නේ දශක පහකට වැඩි කාලයක් එරට පාලනය කළ ප්රධාන ද්රවිඩ පක්ෂ දෙක වන DMK සහ AIADMK යන පක්ෂ දෙකම නොවන රජයක් බලයට පත්වූ ප්රථම අවස්ථාව මෙය වන බැවිනි. සිනමා තිරයේ විස්කම් පෑ විජේ දැන් සැබෑ දේශපාලන පිටියේ සිය ජනතාව වෙනුවෙන් වැඩ ආරම්භ කර ඇති අතර, නව මහ ඇමතිවරයා ලෙස ඔහු ඉටු කිරීමට යන කාර්යභාරය දෙස මුළු ඉන්දියාවම මෙන්ම ලොව පුරා සිටින ඔහුගේ රසික රසිකාවියන් මහත් බලාපොරොත්තු සහිතව බලා සිටිති.
