තණමල්විල, අරඹේකෙම ප්‍රදේශයේ නිවසක තිබී වියළි ගංජා කිලෝග්‍රෑම් 754ක් සමඟ 57 හැවිරිදි පුද්ගලයකු තණමල්විල පොලිසිය විසින් අත්අඩංගුවට ගෙන තිබේ.
පොලිසිය සඳහන් කළේ, අත්අඩංගුවට ගත් ගංජා තොගයේ වටිනාකම රුපියල් කෝටි 10කට ආසන්න බවයි. ලද තොරතුරක් මත සිදුකළ වැටලීමේදී, අලෙවි කිරීම සඳහා සූදානම් කර තිබූ බව කියන ගංජා තොගය නිවසේ කාමරයක තිබී සොයාගෙන ඇත.
හම්බෙගමුවේ “බතලහීන් මහත්තයා” යන අන්වර්ථ නාමයෙන් හඳුන්වනු ලබන මෙම පුද්ගලයාට අයථා වත්කම් සම්බන්ධයෙන් ද විමර්ශන පවතින බවත්, ඔහුට අයත් දේපළ කිහිපයක් මීට පෙර තහනම් කර ඇති බවත් පොලිසිය සඳහන් කරයි.
මූලික විමර්ශනවලදී සැකකරු මහා පරිමාණ ගංජා ජාවාරමට සම්බන්ධ බවට තොරතුරු අනාවරණය වී ඇතැයි පොලිසිය පවසයි.
අත්අඩංගුවට ගත් සැකකරු වැල්ලවාය මහේස්ත්‍රාත් අධිකරණයට ඉදිරිපත් කිරීමට නියමිතව තිබූ අතර, තණමල්විල පොලිසිය වැඩිදුර විමර්ශන සිදු කරයි.
