විදුලි බිල ඉහළ දැමීම සහ ආණ්ඩුවේ පාලන ක්රියාවලිය විවේචනය කරමින් සමගි ජන බලවේගයේ ජාතික සංවිධායක තිස්ස අත්තනායක මහතා අද විශේෂ ප්රකාශයක් සිදු කළේය. මැතිවරණ සමයේ විදුලි බිල අඩු කරන බවට පොරොන්දු වුවද වත්මන් ආණ්ඩුව මේ වන විට සිව්වන වතාවටත් විදුලි බිල ඉහළ නංවා ඇති බවත්, ඒ අනුව සමස්තයක් ලෙස විදුලි බිල සියයට 43කින් පමණ වැඩි වී ඇති බවත් ඔහු පෙන්වා දුන්නේය. ප්රමිතියෙන් තොර ගල් අඟුරු ගෙන්වීම හරහා සිදුවූ වංචාවේ පාඩුව මහජනතාව මත පටවා ඇති බවත්, ඒකක 200ක විදුලි පාරිභෝගිකයෙකුගේ බිල රුපියල් 5000කින් පමණ ඉහළ ගොස් ඇති බවත් ඔහු වැඩිදුරටත් සඳහන් කළේය.
එමෙන්ම රටේ පවතින පොහොර හිඟය හේතුවෙන් කෘෂිකර්මාන්තය දැඩි අවදානමකට ලක්ව ඇති බවත්, ගොවීන් ඉල්ලන පොහොර ප්රමාණය ලබා දීමට අපොහොසත් වීමෙන් අනාගතයේදී ආහාර හිඟයක් ඇති විය හැකි බවත් අත්තනායක මහතා අවධාරණය කළේය. ශ්රී ලංකන් ගුවන් සේවය සඳහා වසර 14ක් පැරණි ගුවන් යානයක් අධික පිරිවැයක් යටතේ කල්බදු පදනම මත ලබා ගැනීම පිටුපස විශාල මූල්ය අක්රමිකතාවක් පවතින බවට චෝදනා කළ ඔහු, රටේ ඩොලර් සංචිත බිලියන 6.7 දක්වා පහත වැටී ඇති බවද පැවසීය. ආණ්ඩුවේ නොහැකියාව හේතුවෙන් ජනතාව දැඩි පීඩාවකට පත්ව ඇති අතර, ආණ්ඩුවට ජන මතය පරීක්ෂා කිරීමට අවශ්ය නම් වහාම පළාත් සභා මැතිවරණය පවත්වන ලෙසද ඔහු අභියෝග කළේය.
