තව අවුරුදු පහකින් තමන් ජනතාව ඉදිරියට යන්නේ ලබා දුන් පොරොන්දු සහ පැවසූ සෑම වචනයකටම සම්පූර්ණ වගවීමක් ඇතිව බව ප්රවාහන, මහා මාර්ග හා නාගරික සංවර්ධන නියෝජ්ය අමාත්ය වෛද්ය ප්රසන්න ගුණසේන මහතා පැවසීය.
රුපියල් මිලියන 4,988ක පිරිවැයකින් ක්රියාත්මක වන වරකාපොළ අතුරු මාර්ග සංවර්ධන ව්යාපෘතියේ ඉදිකිරීම් ආරම්භ කිරීමේ අවස්ථාවට එක්වෙමින් නියෝජ්ය අමාත්යවරයා මේ බව සඳහන් කළේය.
එහිදී වැඩිදුරටත් අදහස් දැක්වූ ඒ මහතා, පාර්ලිමේන්තු මන්ත්රී විශ්රාම වැටුප සහ හිටපු ජනාධිපතිවරුන්ගේ හිමිකම් අහෝසි කිරීම වැනි ජනතා අපේක්ෂා ඉටු කරමින් අවශ්ය නීති සම්පාදනය කර ඇති බවත්, කුමන විරෝධතා පැමිණියද ජනතාව වෙනුවෙන් එම වෙනස්කම් අඛණ්ඩව සිදු කරන බවත් කියා සිටියේය. තවද, ගෝලීය අර්බුද හමුවේ වුවද රටේ ඩොලර් ආර්ථිකය සහ විදේශ සංචිත සාර්ථකව කළමනාකරණය කර ගනිමින් සාමාන්ය ජනතාවට අධික බරක් නොදී රට ඉදිරියට ගෙන යාමට වත්මන් රජය සමත්ව ඇති බව ඔහු වැඩිදුරටත් පෙන්වා දුන්නේය.
මෙම අවස්ථාවට පාර්ලිමේන්තු මන්ත්රීවරුන් වන මනෝජ් රාජපක්ෂ, කංචන වැලිපිටිය, නීතිඥ සාගරිකා අතාවුද යන මහත්ම මහත්මීන් ඇතුළු රාජ්ය නිලධාරීන් සහ ප්රදේශවාසීන් විශාල පිරිසක් එක්ව සිටියහ.
