මහා භාණ්ඩාගාරයේ දත්ත පද්ධතියට එල්ල වූ සයිබර් ප්රහාරයකින් ඩොලර් මිලියන 2.5ක මුදලක් අස්ථානගත වීම සම්බන්ධයෙන් “Free Lawyers” සංවිධානය රජයට දැඩි චෝදනා එල්ල කරයි. එම සංවිධානයේ කැඳවුම්කරු ජනාධිපති නීතීඥ මෛත්රී ගුණරත්න සහ නීතීඥ අතුල ද සිල්වා යන මහත්වරුන් විසින් මේ සම්බන්ධයෙන් ජනාධිපතිවරයා වෙත ප්රශ්නාවලියක් ඉදිරිපත් කර තිබේ.
මෙම ප්රශ්නාවලිය මගින් මතු කර ඇති ප්රධාන කරුණු කිහිපයක් මෙසේය:
සයිබර් ප්රහාරය සහ තොරතුරු වසන් කිරීම
2025 සැප්තැම්බර් 06 වැනිදා හෝ ඊට ආසන්න දිනකදී මුදල් අමාත්යංශයේ දත්ත පද්ධතියට එල්ල වූ සයිබර් ප්රහාරය පිළිබඳව මුදල් අමාත්යවරයා ලෙස ජනාධිපතිවරයා දැනුවත්ව සිටියේද යන්න මෙහිදී ප්රශ්න කර ඇත. එමෙන්ම, මෙම මංකොල්ලය පිළිබඳව ව්යවස්ථාවේ 148 ව්යවස්ථාව ප්රකාරව පාර්ලිමේන්තුව හෝ ජනතාව දැනුවත් කිරීමට පියවර නොගත්තේ මන්දැයි එම සංවිධානය විමසා සිටියි.
මුදල් ලේකම්වරයාගේ වගකීම සහ විමර්ශන
වත්මන් මුදල් ලේකම් හර්ෂණ සූරියප්පෙරුම මහතාට මූල්ය පාලනය පිළිබඳ පූර්ව අත්දැකීම් නොමැති බව පෙන්වා දෙන එම සංවිධානය, ඔහු විසින් මෙම මංකොල්ලයට අදාළ සාක්ෂි වෙනස් කරමින් සිටින බවට චෝදනා කරයි. අප්රේල් 21 වැනිදා “Free Lawyers” සංවිධානය මෙම හෙළිදරව්ව සිදු කරන තෙක් භාණ්ඩාගාර ලේකම්වරයා මේ පිළිබඳව පොලිසියට හෝ රහස් පොලිසියට පැමිණිලි නොකිරීම බරපතළ වරදක් බව ඔවුන් අවධාරණය කරයි.
නිලධාරීන් ඉවත් කිරීමේ ඉල්ලීම
විධිමත් සහ සාධාරණ විමර්ශනයක් සිදු කිරීම සඳහා මුදල් අමාත්යංශ ලේකම්වරයා වහාම ධුරයෙන් ඉවත් කිරීමට ජනාධිපතිවරයා පියවර ගන්නේදැයි එම සංවිධානය විමසා ඇත. තවද, පරිගණක අපරාධ විමර්ශන ඒකක වෙත මෙම සිද්ධිය වාර්තා කළේ කවදාද සහ කවුරුන් විසින්ද යන්න පිළිබඳව පැහැදිලි ප්රකාශයක් ඔවුන් බලාපොරොත්තු වේ.
මුදල්, ජාතික ආරක්ෂක සහ ඩිජිටල් කටයුතු අමාත්යවරයා ලෙස ජනාධිපතිවරයා මෙම සමස්ත මංකොල්ලයේ වගකීම දැරිය යුතු බව “Free Lawyers” සංවිධානය සිය ප්රශ්නාවලිය මගින් වැඩිදුරටත් අවධාරණය කර සිටියි.
