මහා භාණ්ඩාගාරයේ අමෙරිකානු ඩොලර් මිලියන 2.5ක මුදලක් අස්ථානගත වීමේ සිද්ධිය මුල් කරගනිමින් මුදල් අමාත්යාංශ ලේකම් හර්ෂණ සූරියපෙරුම මහතාගේ නිවස ඉදිරිපිට පැවැති විරෝධතාවයකින් පසු, එම නිවසට විශේෂ ආරක්ෂාවක් යොදවා ඇති බවට නව ජනතා පෙරමුණේ නායක සුගීෂ්වර බණ්ඩාර මහතා චෝදනා කරයි. තලංගම පොලීසියට පැමිණිල්ලක් ඉදිරිපත් කිරීමෙන් අනතුරුව මාධ්ය වෙත අදහස් දැක්වූ ඒ මහතා, මුදල් ලේකම්වරයාගේ ආරක්ෂාව වෙනුවෙන් අවිගත් විශේෂ කාර්ය බලකා (STF) සාමාජිකයින් 12 දෙනෙකුගෙන් යුත් කණ්ඩායමක් යොදවා ඇති බව අනාවරණය කළේය.
බත්තරමුල්ල, පැලවත්ත ප්රදේශයේ පිහිටි ලේකම්වරයාගේ නිවස ඉදිරිපිට පැවැති විරෝධතාවයේදී විරෝධතාකරුවන්ට “ගොම ප්රහාරයක්” එල්ල වූ අතර, එය එල්ල කළේ ජනතා විමුක්ති පෙරමුණට සම්බන්ධ පිරිසක් බවට සුගීෂ්වර බණ්ඩාර මහතා චෝදනා කරයි. ප්රහාරයට සම්බන්ධ පුද්ගලයින් අත්අඩංගුවට ගැනීමට පොලිසියට පැය 48ක කාලයක් ලබා දෙන බවත්, එසේ නොමැති වුවහොත් මේ පිළිබඳව ජිනීවා මානව හිමිකම් කවුන්සිලය දක්වා කරුණු වාර්තා කරන බවත් ඔහු අනතුරු ඇඟවීය. වත්මන් රජය මහජන ආරක්ෂාව වෙනුවට නිලධාරීන් ආරක්ෂා කිරීමට නීතිය නවන බවට ද ඔහු මෙහිදී චෝදනා කළේය. මේ අතර, විරෝධතාකරුවන් තමන්ට පරුෂ වචනයෙන් බැණ වැදී කීර්තිනාමයට හානි කළ බව පවසමින් මුදල් අමාත්යාංශ ලේකම් හර්ෂණ සූරියපෙරුම මහතා ද පොලීසියට පැමිණිල්ලක් ඉදිරිපත් කර තිබේ.
