ඉරානය සහ ඊශ්රායලය අතර ඓතිහාසික සාම ගිවිසුමක් අත්සන් කිරීමට සියලු කටයුතු සූදානම් වෙමින් පවතින බවත්, දෙපාර්ශවයම මේ වන විට සාර්ථක සාම ගිවිසුමක අවසාන අදියරට පැමිණ සිටින බවත් ඇමෙරිකානු ජනාධිපති ඩොනල්ඩ් ට්රම්ප් ප්රකාශ කර තිබේ. ඉදිරි දින දෙක තුන ඇතුළත ඊට අදාළ අත්සන් තැබීම් සිදු විය හැකි බවත්, ඉන් පසු ලෝක වෙළඳාමට අතිශය වැදගත් වන ‘හෝමුස් සමුද්ර සන්ධිය’ වහාම විවෘත කිරීමට හැකි වනු ඇති බවත් ඔහු පැවසීය.
පසුගිය අප්රේල් මාසයේ ප්රකාශයට පත් කළ සටන් විරාමයෙන් පසු දෙරට අතර දරුණුතම ගැටුම් මෑතකදී වාර්තා වූ අතර, ඉන් අනතුරුව ප්රහාර තාවකාලිකව නතර කිරීමට දෙපාර්ශවයම එකඟ වී ඇත. ඇමෙරිකාව විසින් ඉරානයට පනවා ඇති නාවික අවහිරතාව, ගුවන් ප්රහාරවලට වඩා සාර්ථක වූ බව පෙන්වා දුන් ට්රම්ප්, “අපට අවශ්ය නම් සති දෙක තුනක් පුරා බෝම්බ හෙළා ඉරානය සම්පූර්ණයෙන්ම විනාශ කළ හැකියි. නමුත් එසේ කළහොත් හෝමුස් සමුද්ර සන්ධිය මාස ගණනාවකට වසා තැබීමට සිදු වෙනවා. වත්මන් නාවික අවහිරතාව නිසයි ඉරානය සාම සාකච්ඡා සඳහා යොමු වුණේ” යැයි සඳහන් කළේය.
මේ අතර, ඊශ්රායල අග්රාමාත්ය බෙන්ජමින් නෙතන්යාහුගේ දැඩි ක්රියාකලාපය පිළිබඳව කලකිරීමට පත්ව සිටින ජනාධිපති ට්රම්ප්, යුද්ධය දිගටම කරගෙන යාමේ ආදීනව පිළිබඳව ඔහුට දැඩිව අනතුරු අඟවා ඇති බව ‘Axios’ විදෙස් මාධ්ය වාර්තා කර තිබේ. එහිදී ට්රම්ප්, “නෙතන්යාහු, ඔබ වඩාත් ප්රවේශම් විය යුතුයි. නැතහොත් නුදුරේදීම ඔබට තනිවම සටන් කිරීමට සිදුවේවි” යැයි පවසා ඇත. එසේම සිය ‘Truth Social’ ගිණුමේ සටහනක් තබමින් ඇමෙරිකානු ජනාධිපතිවරයා දෙපාර්ශවයෙන්ම ඉල්ලා සිටියේ වහාම වෙඩි තැබීම් නතර කරන ලෙසයි.
