වොෂින්ටන් හි වොෂින්ටන් හිල්ටන් හෝටලයේ පැවැත්වෙමින් තිබූ ධවල මන්දිර වාර්තාකරුවන්ගේ සංගමයේ වාර්ෂික රාත්රී භෝජන සංග්රහය අතරතුර වෙඩි හඬක් යැයි සැක කළ හැකි ප්රබල ශබ්ද කිහිපයක් ඇසීමත් සමඟ විශාල නොසන්සුන්කාරී තත්ත්වයක් හටගෙන තිබේ. මෙම අනපේක්ෂිත සිදුවීමත් සමඟ ඇමරිකානු ජනාධිපති ඩොනල්ඩ් ට්රම්ප් සහ මෙලනියා ට්රම්ප් වහාම එම ස්ථානයෙන් ඉවත් කිරීමට රහස් ඔත්තු සේවා නිලධාරීන් පියවර ගෙන ඇති බව විදෙස් මාධ්ය වාර්තා කරයි.
සෙනසුරාදා සන්ධ්යාවේ සිදුවූ මෙම සිදුවීම පිළිබඳව වැඩිදුරටත් වාර්තා වන්නේ, භෝජනාගාරය තුළින් මහා හඬක් ඇසීමත් සමඟ ජනාධිපතිවරයා ඇතුළු අමුත්තන් බිම වැතිර ආරක්ෂාව සෙවීමට උත්සාහ කර ඇති බවයි. එහිදී වහාම ක්රියාත්මක වූ ආරක්ෂක අංශ ජනාධිපති යුවළව ප්රධාන අසුන් පැනවූ මේසයෙන් ඉවත් කර ආරක්ෂිත ස්ථානයක් කරා රැගෙන ගොස් ඇත. ඉන් අනතුරුව නවීන ගිනි අවිවලින් සන්නද්ධ ආරක්ෂක නිලධාරීන් කණ්ඩායමක් ජනාධිපතිවරයා අසුන්ගෙන සිටි ප්රදේශය වට කරමින් දැඩි ආරක්ෂක වළල්ලක් යොදවා තිබේ.
ධවල මන්දිර වාර්තාකරුවන්ගේ සංගමයේ සභාපතිනි වෙයිජියා ජියැං පවසා සිටියේ මෙම සිදුවීම පිළිබඳව මේ වන විට වැඩිදුර විමර්ශන ආරම්භ කර ඇති බවයි. කෙසේ වෙතත්, තාවකාලිකව නවතා දැමූ උත්සවයේ කටයුතු යළි ආරම්භ කිරීමට පියවර ගෙන ඇත. මෙම ශබ්දය ඇති වූයේ කුමන හේතුවක් නිසාද යන්න හෝ කිසිවෙකුට හානියක් සිදුවී ඇත්ද යන්න පිළිබඳව මෙතෙක් නිල ප්රකාශයක් නිකුත් කර නොමැති වුවද, මෙය වෙඩි තැබීමක් විය හැකි බවට විදෙස් මාධ්ය සැක පළ කරයි.
