ඇමෙරිකානු ජනාධිපති ඩොනල්ඩ් ට්රම්ප් විසින් ඉරානය සමඟ පවතින සටන් විරාමය දින නියමයක් නොමැතිව දීර්ඝ කිරීමට තීරණය කිරීමත් සමඟ ලෝක වෙළෙඳපොළේ රන් මිල ඉහළ ගොස් ඇති අතර තෙල් මිල පහත වැටී තිබේ. සටන් විරාමය අවසන් වීමට පැය කිහිපයකට පෙර ට්රම්ප් ගත් මෙම ඒකපාර්ශ්වික තීරණය හේතුවෙන් මැදපෙරදිග කලාපයේ උණුසුම් තත්ත්වය තාවකාලිකව සමනය වනු ඇතැයි ආයෝජකයෝ අපේක්ෂා කරති.
අද (අප්රේල් 22) පෙරවරුවේ රන් අවුන්සයක මිල 0.9% කින් ඉහළ ගොස් ඇමෙරිකානු ඩොලර් 4,755.11 ක් ලෙස වාර්තා විය. සටන් විරාමය දීර්ඝ කිරීමත් සමඟ උද්ධමනය ඉහළ යාමේ බිය පහව යාම සහ පොලී අනුපාත සම්බන්ධයෙන් පවතින අවිනිශ්චිතතාවය රන් මිල ඉහළ යාමට ප්රධාන වශයෙන් බලපා ඇත. තෙල් මිල පහත වැටීම හේතුවෙන් ප්රවාහන හා නිෂ්පාදන පිරිවැය අඩු වීම උද්ධමනය පාලනය කිරීමට රුකුලක් වනු ඇතැයි විශ්ලේෂකයෝ පවසති.
මේ අතර ෆෙඩරල් බැංකුවේ මීළඟ ප්රධානියා ලෙස නම් කර ඇති කෙවින් වෝෂ් ප්රකාශ කර ඇත්තේ පොලී අනුපාත අඩු කරන ලෙස ජනාධිපති ට්රම්ප් කළ ඉල්ලීමට තමා කිසිදු පොරොන්දුවක් ලබා නොදුන් බවයි. බැංකුවේ ස්වාධීනත්වය ආරක්ෂා කරමින් කටයුතු කරන බව ඔහු සෙනෙට් මණ්ඩලය හමුවේ අවධාරණය කර ඇත. සටන් විරාමය දිගටම පැවතුණහොත් රන් මිල තවදුරටත් ස්ථාවර වනු ඇතැයි ආර්ථික විශේෂඥයෝ අනුමාන කරති.
