ඉරානය විසින් ඉදිරිපත් කරන ලද නව සාම යෝජනාව පිළිගැනීමට ඇති ඉඩකඩ ඉතා අඩු බව අමෙරිකානු ජනාධිපති ඩොනල්ඩ් ට්රම්ප් පවසයි. ඉරානය මෙතෙක් ලෝකයට සිදු කළ විනාශය වෙනුවෙන් “ප්රමාණවත් තරම් විශාල වන්දියක් ගෙවා නොමැති” බව පවසමින් ඔහු මෙම ඉඟිය ලබා දී තිබේ.
මාස දෙකකට පෙර ආරම්භ කළ යුද්ධය අවසන් කිරීමට උත්සාහ කරන අතරතුරම, ගුවන් ප්රහාර යළි ආරම්භ කිරීමේ හැකියාව පිළිබඳව ද ජනාධිපතිවරයා සිය සමාජ මාධ්ය ගිණුම් ඔස්සේ අදහස් දක්වා ඇත. “පසුගිය වසර 47 පුරා ඔවුන් මානව වර්ගයාට කළ විනාශය වෙනුවෙන් තවමත් ප්රමාණවත් වන්දියක් ගෙවා නැති නිසා, මෙම යෝජනාව පිළිගත හැකි එකක් වේවි යැයි සිතිය නොහැකියි” යනුවෙන් ජනාධිපතිවරයා වැඩිදුරටත් සඳහන් කර තිබේ.
අමෙරිකාව සහ ඊශ්රායලය ඉරානයට එල්ල කරන ප්රහාර තාවකාලිකව අත්හිටුවා තිබුණද, ලෝක බලශක්ති සැපයුමට දැඩි බලපෑම් එල්ල කර ඇති මෙම යුද්ධය අවසන් කිරීමට මෙතෙක් එකඟතාවයක් ඇති වී නොමැත. ඉරානය යෝජනා කර ඇත්තේ පළමුව හෝමූස් සමුද්ර සන්ධිය විවෘත කර අමෙරිකානු අවහිරතා ඉවත් කරන ලෙසයි. කෙසේ වෙතත්, ඉරානය සතු අධි-සමෘද්ධිමත් යුරේනියම් තොගය ඉවත් කරන තෙක් යුද්ධය අවසන් නොකරන බව වොෂින්ටනය දැඩිව අවධාරණය කරයි.
හෝමූස් සමුද්ර සන්ධිය අවහිර වීම හේතුවෙන් ලෝක තෙල් සහ ගෑස් සැපයුමෙන් සියයට 20ක් පමණ නතර වී ඇති අතර, මේ හේතුවෙන් අමෙරිකාවේ ඉන්ධන මිල ශීඝ්රයෙන් ඉහළ ගොස් ඇත. එළඹෙන නොවැම්බර් මාසයේ පැවැත්වීමට නියමිත කොංග්රස් මණ්ඩල අතුරු මැතිවරණය හමුවේ මෙම ඉන්ධන මිල ඉහළ යාම ට්රම්ප් පරිපාලනයට දැඩි දේශපාලන පීඩනයක් එල්ල කර ඇති බව විදෙස් වාර්තා පෙන්වා දෙයි.
