හොර්මූස් සමුද්ර සන්ධිය හරහා යාත්රා කරන නෞකාවලින් කිසිදු ආකාරයක බදු මුදලක්, රක්ෂණ ගාස්තුවක් හෝ වෙනත් කිසිදු අයකිරීමක් තමන් බලාපොරොත්තු නොවන අතර, එවැන්නක් ලබාගෙන ද නොමැති බව ඉරානය විසින් ඇමෙරිකාවට දැනුම් දී තිබේ. ඇමෙරිකානු ජනාධිපති ඩොනල්ඩ් ට්රම්ප් සිය ‘Truth Social’ සමාජ මාධ්ය ගිණුමේ සටහනක් තබමින් මේ බව අනාවරණය කර ඇත. කලබලකාරී වාතාවරණයක් මවන “ව්යාජ පුවත්” (Fake News) මඟින් මීට පටහැනිව වාර්තා කර තිබුණ ද, ඉරානය විසින් තමන් වෙත මෙම සහතිකය ලබා දුන් බව ට්රම්ප් පවසයි.
කෙසේ වෙතත්, ඉරානය ලබා දී ඇති මෙම තොරතුර අසත්යයක් බව හෙළි වුවහොත් දෙරට අතර දැනට පවතින රාජ්යතාන්ත්රික සාකච්ඡා වහාම අත්හිටුවන බවට ද ජනාධිපතිවරයා දැඩිව අනතුරු අඟවා තිබේ. මේ අතර ඇමෙරිකාව විසින් ඉරානය වෙත කිසිදු මුදලක් ලබා දී හෝ ඔවුන්ගේ මුදල් නිදහස් කර නොමැති බව පවසන ට්රම්ප්, දැනට ඇමෙරිකානු පාලනය යටතේ පවතින ඉරාන මුදල්වලින් කොටසක් ඇමෙරිකානු ගොවීන් සහ පශු සම්පත් පාලකයින් වෙනුවෙන් නිදහස් කරන බව ද සඳහන් කරයි. එම මුදල් භාවිත කරමින් ඇමෙරිකානු ගොවීන්ගෙන් බඩඉරිඟු, තිරිඟු සහ සෝයා බෝංචි මිලදී ගැනීමට නියමිතය. දැනට දැඩි ආහාර හිඟයකින් පෙළෙන ඉරානය වෙනුවෙන් මෙම ආහාර ද්රව්ය මිලදී ගැනීම සුවිශේෂී ලෙස ඇමෙරිකාවෙන් පමණක් සිදු කරන බව ද ඩොනල්ඩ් ට්රම්ප් අවධාරණය කර ඇත.
