තායිවානය වෙත නව ආයුධ සැපයීම සම්බන්ධයෙන් තමන් මෙතෙක් ස්ථිර තීරණයක් ගෙන නොමැති බව අමෙරිකානු ජනාධිපති ඩොනල්ඩ් ට්රම්ප් ප්රකාශ කිරීමත් සමඟ, අමෙරිකානු නීතියට අනුව තමන්ට ආරක්ෂක උපකරණ සැපයීමට වොෂින්ටනය බැඳී සිටින බව තායිවාන රජය අවධාරණය කර තිබේ. චීන ජනාධිපති ෂී ජින්පිං සමඟ බීජිං නුවරදී පැවැති සාකච්ඡාවලින් අනතුරුව ට්රම්ප් දැක්වූ මෙම අදහස් හේතුවෙන් තායිවානයට ලැබෙන අමෙරිකානු ආරක්ෂක සහාය පිළිබඳව යම් අවිනිශ්චිතතාවයක් මතුව ඇත.
තායිවාන ජනාධිපති ලායි චින්-ටේ (Lai Ching-te) ගේ ප්රකාශක කැරන් කුඕ (Karen Kuo) සඳහන් කළේ, ඉන්දු-පැසිෆික් කලාපයේ ස්ථාවරත්වය බිඳදමන එකම සාධකය චීනයේ මිලිටරි තර්ජන බවයි. එමෙන්ම අමෙරිකාව සහ තායිවානය අතර සිදුවන අවි ආයුධ ගනුදෙනු ‘තායිවාන සබඳතා පනත’ (Taiwan Relations Act) මඟින් තහවුරු කර ඇති ආරක්ෂක කැපවීමක් වන අතර, එය කලාපීය තර්ජන වැළැක්වීම සඳහා අන්යෝන්ය වශයෙන් වැදගත් වන බවද ඇය පෙන්වා දුන්නාය. පසුගිය දෙසැම්බර් මාසයේදී ට්රම්ප් පරිපාලනය විසින් තායිවානය සඳහා ඩොලර් බිලියන 11 ක වාර්තාගත ආයුධ පැකේජයක් අනුමත කළ අතර, දැනට ඩොලර් බිලියන 14 ක වටිනාකමකින් යුත් දෙවන ආයුධ පැකේජයක් ට්රම්ප්ගේ අනුමැතිය ලැබෙන තෙක් පවතී.
චීන සංචාරයෙන් පසු ට්රම්ප් මාධ්ය වෙත අදහස් දක්වමින්, මෙම ආයුධ අලෙවිය සම්බන්ධයෙන් තමන්ට තායිවානය පාලනය කරන පුද්ගලයා (ජනාධිපති ලායි) සමඟ සෘජුව කතා කිරීමට සිදුවන බව ද ඉඟි කර තිබුණි. තායිවාන ජ්යෙෂ්ඨ ආරක්ෂක නිලධාරියෙකු ප්රකාශ කළේ අවි ආයුධ විකිණීම පිළිබඳව සාකච්ඡා කළ යුත්තේ බීජිං පාලනය සමඟ නොව තායිවානය සමඟ බව ට්රම්ප්ගේ ප්රකාශයෙන් පැහැදිලි වන බවයි. කෙසේ වෙතත්, ට්රම්ප් බීජිං නුවර රැඳී සිටි කාලය තුළදී පවා චීන හමුදාව තායිවාන සීමාව අසල සිය මිලිටරි බලපෑම් අඛණ්ඩව ක්රියාත්මක කර තිබේ.
