ඇමෙරිකාවේ ප්රමුඛ පෙළේ අධ්යාපන ආයතනයක් වන ටෆ්ට්ස් විශ්වවිද්යාලයේ (Tufts University) බෞද්ධ ආගමික උපදේශකවරයා ලෙස කටයුතු කළ 32 හැවිරිදි මහායායේ විනීත හිමියන්, මුදලට ලිංගික සේවා ලබාගැනීමට තැත් කිරීමේ චෝදනාව මත බොස්ටන් පොලිසිය විසින් අත්අඩංගුවට ගෙන තිබේ. ලෝක කුසලාන පාපන්දු තරගාවලිය මුල් කරගනිමින් සිදුවන කාන්තා සහ ළමා ලිංගික ජාවාරම් මැඩපැවැත්වීම සඳහා බොස්ටන් පොලිසියේ මිනිස් ජාවාරම් මර්දන අංශය දියත් කළ “ඔපරේෂන් රෙඩ් කාඩ්” (Operation Red Card) විශේෂ උපායදූත මෙහෙයුමකදී උන්වහන්සේ මෙම උගුලට හසුවී ඇත. ජූනි 13 වනදා බොස්ටන්හි ස්ටුවර්ට් වීදියේ පිහිටි හෝටලයකදී සිදුකළ මෙම වැටලීමේදී උන්වහන්සේ සමඟ තවත් ගිහි පුද්ගලයන් හයදෙනෙකු පොලිස් භාරයට පත්ව ඇති අතර, මෙම නින්දිත චෝදනාවත් සමඟ වහාම ක්රියාත්මක වන පරිදි විශ්වවිද්යාලයේ ආගමික උපදේශක ධුරයෙන් ඉල්ලා අස්වීමට ද උන්වහන්සේට සිදුවී ඇති බව විශ්වවිද්යාල පාලනාධිකාරිය තහවුරු කරයි.
අත්අඩංගුවට ගත් ඇන්ජලෝ ෆුර්ටාඩෝ, ඩැරන් ෆ්රැන්සිස්කෝ, මැතිව් ෆිට්ස්පැට්රික් ඇතුළු සෙසු සැකකරුවන් සමඟ මෙම භික්ෂුවට එරෙහිව ද බොස්ටන් මහේස්ත්රාත් අධිකරණය හමුවේ “මුදලට ලිංගික සේවා ලබා ගැනීමට තැත් කිරීම” (Sex for a fee) යන වරද යටතේ නඩු පවරා ඇත. කෙසේ වෙතත්, අධිකරණය හමුවේ පෙනී සිටි මහායායේ විනීත හිමියන් තමන් මෙම වරද සිදු නොකළ බව ප්රකාශ කරමින් නිවැරදිකරු බව පවසා ඇති අතර, නඩුව ලබන සැප්තැම්බර් මස 02 වැනිදා දක්වා කල් තබා තිබේ. මෙම සිදුවීම ශ්රී ලාංකික බෞද්ධ ප්රජාව තුළ දැඩි කම්පනයක් සහ කලකිරීමක් ඇති කිරීමට හේතුවී ඇති නමුත්, නීතිමය විමර්ශන තවමත් ක්රියාත්මක මට්ටමේ පවතින බැවින් සිද්ධියේ අවසන් තීන්දුව අධිකරණය සතු වෙයි.
