අමෙරිකානු ජාතික බුද්ධි අංශ ප්රධානී (Director of National Intelligence) තුල්සි ගැබාර්ඩ් (Tulsi Gabbard) මහත්මිය සිය ධුරයෙන් ඉල්ලා අස්වීමට තීරණය කර තිබේ. ඇය ජනාධිපති ඩොනල්ඩ් ට්රම්ප් වෙත නිල වශයෙන් දැනුම් දී ඇත්තේ සිය සැමියා මුහුණ දී සිටින බරපතළ රෝගී තත්ත්වය හේතුවෙන් තමන් මෙම තීරණය ගත් බවයි. වසර එකොළහක විවාහ ජීවිතය තුළ තමන්ට ශක්තියක් වූ සැමියා වන ඒබ්රහම්, මෑතකදී දුර්ලභ ගණයේ පිළිකා රෝගයකින් පෙළෙන බවට හඳුනාගෙන ඇති අතර, මෙම අභියෝගාත්මක අවස්ථාවේදී ඔහු අසල රැඳී සිටිමින් උපකාර කිරීම තමන්ගේ ප්රමුඛතම වගකීම බව ඇය පෙන්වා දී ඇත.
සිය ඉල්ලා අස්වීමේ ලිපිය මඟින් ජනාධිපතිවරයා වෙත අදහස් දක්වමින් ඇය සඳහන් කර ඇත්තේ, මෙතෙක් කල් තමන්ගේ වෘත්තීය සහ දේශපාලන ජීවිතයේ වගකීම් මැනවින් ඉටු කිරීමට සැමියාගෙන් ලැබුණු සහයෝගය අපමණ බවයි. ඒ අනුව එළඹෙන ජූනි මස තිස්වැනිදා සිට ක්රියාත්මක වන පරිදි සිය ඉල්ලා අස්වීම පිළිගන්නා ලෙස ඇය ජනාධිපති ඩොනල්ඩ් ට්රම්ප්ගෙන් ඉල්ලා සිටියි. ට්රම්ප් පරිපාලනයේ ආරක්ෂක සහ බුද්ධි අංශ ක්ෂේත්රය තුළ ප්රධානතම භූමිකාවක් ඉටුකළ ඉහළ පෙළේ නිලධාරිනියක මෙලෙස හදිසියේම සිය පෞද්ගලික හේතුවක් මත ධුරයෙන් ඉවත් වීම ජාත්යන්තර දේශපාලන කරළියේ දැඩි අවධානයට ලක්ව තිබේ.
