1996 වසරේදී අමෙරිකාවේ ලාස් වේගාස්හිදී සිදුවූ ජනප්‍රිය රැප් ගායක ටූපැක් ෂකූර්ගේ ඝාතනය සම්බන්ධයෙන් වරදකරු වූ හිටපු අපරාධ කල්ලි නායක ඩුවේන් ඩේවිස්ට වසර 40ක සිට ජීවිතාන්තය දක්වා සිරදඬුවම් නියම කර තිබේ.
63 හැවිරිදි ඩේවිස් පසුගිය අගෝස්තු මාසයේදී පළමු මට්ටමේ මිනීමැරුම් චෝදනාවට ජූරි සභාවක් විසින් වරදකරු කරනු ලැබීය. ඒ අනුව, මිනීමැරුම සම්බන්ධයෙන් වසර 20ක සිට ජීවිතාන්තය දක්වා සිරදඬුවමක් සහ මාරාන්තික ආයුධයක් භාවිත කිරීම සම්බන්ධයෙන් තවත් වසර 20ක සිට ජීවිතාන්තය දක්වා සිරදඬුවමක් ඔහුට නියම කර ඇති බව විදෙස් මාධ්‍ය වාර්තා කරයි.
1996 සැප්තැම්බර් 7 වැනිදා ලාස් වේගාස්හි MGM Grand කැසිනෝ ශාලාවේදී ඩේවිස්ගේ බෑණාට ටූපැක් සහ ඔහුගේ පිරිස පහරදීමෙන් පසු පළිගැනීමේ අරමුණින් ඝාතනය සැලසුම් කළ බව නඩු විභාගයේදී අනාවරණය වී තිබේ.
එදින රාත්‍රියේ ටූපැක් ගමන් කළ මෝටර් රථය අසලට සුදු පැහැති මෝටර් රථයකින් පැමිණි පිරිසක් වෙඩි තබා ඇති අතර, එහිදී ඔහුට වෙඩි ප්‍රහාර හතරක් එල්ල වී ඇත. දින හයකට පසු ඔහු රෝහලේදී මියගොස් තිබේ.
කෙසේ වෙතත්, ටූපැක්ට මාරාන්තික වෙඩි ප්‍රහාර එල්ල කළ පුද්ගලයා කවුරුන්ද යන්න මෙතෙක් නිශ්චිතව තහවුරු වී නොමැත. ඩේවිස්ට සෘජුවම වෙඩි තැබීම සිදුකළ බවට චෝදනා එල්ල වී නොතිබුණද, ඝාතනයට සම්බන්ධ වූ පුද්ගලයෙකු ලෙස ඔහු මිනීමැරුම් චෝදනාවට වරදකරු කර තිබේ.
වසර ගණනාවක් නොවිසඳී පැවති මෙම ඝාතනය සම්බන්ධයෙන් ඩේවිස් 2023 වසරේදී අත්අඩංගුවට ගනු ලැබීය. ඔහු මාධ්‍ය හමුවලදී කළ ප්‍රකාශ, Compton Street Legend කෘතියේ සඳහන් කරුණු සහ විමර්ශකයන් සමඟ පැවැත්වූ රහසිගත සාකච්ඡාවල පටිගත කිරීම්ද නඩුවේදී සාක්ෂි ලෙස ඉදිරිපත් කර තිබේ.
අධිකරණයේදී අවසන් වරට අදහස් දැක්වූ ඩේවිස්, මෙම තීන්දුවට එරෙහිව අභියාචනයක් ඉදිරිපත් කරන බව ප්‍රකාශ කර ඇත. ඔහුගේ නීතිඥවරයාද අභියාචනයක් ඉදිරිපත් කරන බව සඳහන් කර තිබේ.
මේ අතර, අධිකරණයේදී සංවේදී ප්‍රකාශයක් කළ ටූපැක්ගේ සහෝදරිය සෙකියිවා ෂකූර් සඳහන් කර ඇත්තේ ඔවුන්ගේ මව ටූපැක්ව මානව හිමිකම් ක්‍රියාකාරිකයෙකු ලෙස ඇතිදැඩි කළ බවත්, ලෝකය යහපත් අතට වෙනස් කිරීමට ඔහුට හැකි බවට විශ්වාසයක් ඔහු තුළ ඇති කළ බවත්ය.
1990 දශකයේ රැප් සංගීත ක්ෂේත්‍රයේ වඩාත්ම බලපෑම් සහගත කලාකරුවෙකු වූ ටූපැක් ෂකූර්ගේ ඝාතනය, එවකට අමෙරිකාවේ නැගෙනහිර හා බටහිර වෙරළබඩ රැප් කණ්ඩායම් අතර පැවති ගැටුම් තවදුරටත් උත්සන්න කිරීමටද බලපා තිබේ.
