ඉන්දියාව සතු දියුණුම ආරක්ෂක අවි පද්ධති කිහිපයක් මිලදී ගැනීම සඳහා එක්සත් අරාබි එමීර් රාජ්යය (UAE) සහ ඉන්දියාව අතර මූලික වටයේ සාකච්ඡා ආරම්භ වී ඇති බව රොයිටර් පුවත් සේවය වාර්තා කරයි. මෙම ආරක්ෂක ගනුදෙනුව යටතේ ලොව වේගවත්ම සුපර්සොනික් කෲස් මිසයිලයක් වන ‘බ්රහ්මෝස්’ (BrahMos) සහ ‘ආකාෂ්තීර්’ (Akashteer) ගුවන් ආරක්ෂණ පද්ධතිය මිලදී ගැනීමට එක්සත් අරාබි එමීර් රාජ්යය විශේෂ උනන්දුවක් දක්වා ඇත. මෑත කාලීනව මැදපෙරදිග කලාපයේ ඇති වූ අස්ථාවරත්වය සහ ආරක්ෂක තර්ජන හමුවේ සිය මිලිටරි බලය ශක්තිමත් කරගැනීම UAE හි ප්රධාන අරමුණ වී තිබේ. විශේෂයෙන්ම තීරණාත්මක මුහුදු මාර්ගයක් වන හෝමුස් සමුද්ර සන්ධිය ආරක්ෂා කරගැනීමට සහ ගුවන් තර්ජන මැඩපැවැත්වීමට මෙම අවි පද්ධති උපකාරී වනු ඇතැයි ආරක්ෂක විශ්ලේෂකයෝ පවසති.
මෙම සාකච්ඡාවල කේන්ද්රස්ථානය වී ඇති බ්රහ්මෝස් මිසයිල පද්ධතිය ඉන්දියාව සහ රුසියාව ඒකාබද්ධව නිපදවන ලද්දක් වන අතර එය ලොව වේගවත්ම කෲස් මිසයිල කාණ්ඩයට අයත් වේ. ශබ්දයේ වේගය මෙන් තුන් ගුණයකින් ගමන් කළ හැකි මෙම මිසයිල පද්ධතිය ගොඩබිම, මුහුද සහ ගුවන් යානා මගින් ප්රහාර එල්ල කිරීමේ හැකියාවෙන් යුක්තය. ඒ සමඟම එක්සත් අරාබි එමීර් රාජ්යයේ අවධානය යොමුව ඇති ආකාෂ්තීර් පද්ධතිය ඉන්දීය යුධ හමුදාව සහ භාරත් ඉලෙක්ට්රොනික්ස් ආයතනය එක්ව නිපදවූවකි. එය සතුරු ඩ්රෝන, මිසයිල සහ ප්රහාරක යානා ක්ෂණිකව හඳුනාගෙන ඒවා විනාශ කිරීම සඳහා ගුවන් ආරක්ෂක ජාලයන් ඒකාබද්ධ කරන නවීන ස්වයංක්රීය පද්ධතියක් ලෙස ක්රියා කරයි.
මෙම මිසයිල අපනයනය කිරීම සඳහා රුසියාවේ අනුමැතිය අවශ්ය වුවද, රුසියාව සහ එක්සත් අරාබි එමීර් රාජ්යය අතර පවතින සමීප සබඳතා හේතුවෙන් එය බාධාවක් නොවන බව රාජ්ය තාන්ත්රික ආරංචි මාර්ග සඳන් කරයි. 2026 මාර්තු මාසයෙන් අවසන් වූ මූල්ය වර්ෂය තුළ ඉන්දියාවේ ආරක්ෂක අපනයන ඇමරිකානු ඩොලර් බිලියන 4 සීමාව ඉක්මවා ගොස් ඇති අතර, පිලිපීනය, ඉන්දුනීසියාව සහ වියට්නාමය ද මීට පෙර බ්රහ්මෝස් මිසයිල මිලදී ගැනීමට ගිවිසුම්ගත වී ඇත. මෙම නව සාකච්ඡා හරහා ඉන්දියාව සහ එක්සත් අරාබි එමීර් රාජ්යය අතර පවතින වෙළඳ, බලශක්ති සහ උපායමාර්ගික සබඳතා තවදුරටත් ශක්තිමත් වනු ඇතැයි අපේක්ෂා කෙරේ.
