මැදපෙරදිග කලාපයේ පවතින යුද ගැටුම් හේතුවෙන් ගුවන් යානා ඉන්ධන මිල ඉහළ ගොස් තිබුණද, එම පදනම මත සිය ගුවන් ගමන් වාර අවලංගු කරගැනීමෙන් වළකින ලෙස බ්රිතාන්ය බලධාරීන් එරට සංචාරකයන්ගෙන් ඉල්ලා සිටී. වත්මන් තත්ත්වය තුළ එක්සත් රාජධානිය තුළ ඉන්ධන හිඟයක් නොමැති බවත්, ගුවන් ගමන් බාධාවකින් තොරව පවත්වාගෙන යාම සඳහා අවශ්ය විකල්ප සැලසුම් සකස් කර ඇති බවත් බ්රිතාන්ය ප්රවාහන දෙපාර්තමේන්තුව නිවේදනය කර ඇත.
ගෝලීය වශයෙන් ගුවන් ගමන් වාර 13,000ක් පමණ මැයි මාසයේදී කපා හැරීමට ගුවන් සමාගම් පියවර ගෙන ඇති අතර එය සමස්ත ගුවන් ගමන්වලින් සියයට එකක පමණ ප්රමාණයකි. විශේෂයෙන් ඉස්තාන්බුල් සහ මියුනිච් වැනි ගමනාන්ත වෙත මෙහි බලපෑම එල්ල වී තිබුණද, බ්රිතාන්යයට පැමිණෙන සහ පිටත්ව යන ගුවන් ගමන් සඳහා මෙතෙක් බරපතළ බාධාවක් එල්ල වී නොමැත. ගුවන් ගමන් අවලංගු වුවහොත් පූර්ණ මුදල් ප්රතිපූරණයක් හෝ විකල්ප ගමන් මාර්ගයක් ලබා ගැනීමට සංචාරකයන්ට නීත්යානුකූල අයිතියක් ඇති බව ද රජය පෙන්වා දෙයි.
ඉන්ධන හිඟයකදී ගුවන් තොටුපළවල සිය ගුවන් ගමන් මෙහෙයුම් අවස්ථා අහිමි නොවී ගුවන් ගමන් ඒකාබද්ධ කිරීමට හෝ අවලංගු කිරීමට ගුවන් සමාගම්වලට අවසර දෙන නව නීති ද බ්රිතාන්ය රජය විසින් හඳුන්වා දී තිබේ. පවතින තත්ත්වය අනුව මැයි මාසයේ පාසල් නිවාඩු කාලය තුළ සංචාරක සැලසුම් වෙනස් කිරීමට අවශ්ය නොවන බවත්, තම ගුවන් සමාගම් සමඟ නිරන්තරයෙන් සම්බන්ධ වෙමින් නවතම තොරතුරු ලබා ගන්නා ලෙසත් සංචාරක නියෝජිතයන් පවසයි.
