මීගමුව බන්ධනාගාරයේ ඇති වූ දරුණු සිදුවීම සම්බන්ධයෙන් එක්සත් ජාතීන්ගේ ශ්රී ලංකාවේ නේවාසික සම්බන්ධීකාරක මාර්ක් ඇන්ඩ්රේ ෆ්රැන්වේ (Marc-André Franche) මහතා සිය දැඩි ශෝකය පළ කර තිබේ. එක්සත් ජාතීන්ගේ සංවිධානය නිවේදනයක් නිකුත් කරමින් මෙම ඛේදවාචකයෙන් විපතට පත් වූ පවුල් වෙත සිය කණගාටුව පළ කර ඇති අතර, තුවාල ලැබූවන්ට ඉක්මන් සුවය ප්රාර්ථනා කර ඇත. ඉතා දුෂ්කර කාර්යයක නිරත වන බන්ධනාගාර නිලධාරීන්ගේ අහිමි වීම දැඩි ලෙස දැනෙන බව පෙන්වා දෙන එම නිවේදනය, රජයේ රැකවරණය යටතේ සිටින රැඳවියන්ගේ මෙන්ම නිලධාරීන්ගේද ආරක්ෂාව උපරිමයෙන් සහතික කිරීම රජයේ මූලික වගකීමක් බව අවධාරණය කරයි.
මෙම සිදුවීම තුළින් මෙරට බන්ධනාගාර පද්ධතියේ පවතින සිරකරුවන් අධික වීම, යල් පැන ගිය ක්රමවේද සහ පහසුකම් හිඟකම වැනි බරපතළ අභියෝග මතු වී ඇති බවත්, ඒ සඳහා අඛණ්ඩව ආයෝජනය කිරීමේ වැදගත්කම වැටහෙන බවත් එහි දැක්වේ. එසේම මේ පිළිබඳව සෙවීමට ස්වාධීන විමර්ශන කමිටුවක් පිහිටුවීම අගය කරන එක්සත් ජාතීන්ගේ සංවිධානය, එම කමිටුවේ නිර්දේශ රජය විසින් ක්රියාත්මක කළ යුතු බව දන්වා සිටියි. බන්ධනාගාර ආරක්ෂාව, රැඳවුම් පහසුකම් සහ කාර්ය මණ්ඩල සුබසාධනය ඉහළ නැංවීම සඳහා ශ්රී ලංකාවට අවශ්ය තාක්ෂණික සහය ඇතුළු සියලු සහයෝගයන් අඛණ්ඩව ලබා දෙන බවද UN සංවිධානය වැඩිදුරටත් ප්රකාශ කර තිබේ.
