මෙරට ඇති වූ දරුණුතම ආර්ථික අර්බුදය සහ දූෂණ හා වංචා හේතුවෙන් ශ්රී ලංකිකයන්ගේ මානව හිමිකම්වලට දැඩි බලපෑම් එල්ල වී ඇති බව එක්සත් ජාතීන්ගේ මානව හිමිකම් පිළිබඳ මහ කොමසාරිස් වෝල්කර් ටර්ක් මහතා පෙන්වා දී ඇති අතර, ශ්රී ලංකාව පිළිබඳ ඔහුගේ නවතම වාර්තාව එක්සත් ජාතීන්ගේ මානව හිමිකම් කවුන්සිලයේ 63 වැනි සැසිවාරයට ඉදිරිපත් කර තිබේ. මෙම වාර්තාව මඟින් වංචා සහ දූෂණයන්ට එරෙහිව ශ්රී ලංකා රජය ගෙන යන වැඩපිළිවෙළ සහ කැපවීම පැසසුම්ට ලක් කර ඇති බව සඳහන් වේ.
එම වාර්තාවෙන් පෙන්වා දී ඇත්තේ 2026 වසරේ අයවැයේ රාජ්ය ආදායමෙන් සියයට 49.38ක් ණය සඳහා පොලී ගෙවීමට වෙන්කර ඇති බවත්, ණය වාරිකද සමඟ සැලකීමේදී රාජ්ය ආදායමෙන් සියයට 82.59ක් පමණ ණය ආපසු ගෙවීම සඳහා වෙන් කිරීමට සිදුවී ඇති බවත්ය. සෞඛ්ය, අධ්යාපනය සහ සමාජ ආරක්ෂණ වැඩසටහන් සඳහා සීමිත ප්රතිපාදන වෙන්වී ඇති මෙම පසුබිම තුළ, මේ වසරේ මැයි මාසය වනවිට මෙරට ජනගහනයෙන් සියයට 22.1ක් දරිද්රතාවයෙන් පෙළෙන බවට ඇස්තමේන්තු කර ඇති අතර, දිට්වා සුළි කුණාටුවෙන් සිදුවූ දැඩි ආර්ථික හා භෞතික හානියෙන් යථා තත්ත්වයට පත්වීමට ඇමෙරිකානු ඩොලර් බිලියන 3.4ක පමණ මුදලක් අවශ්ය වන බවද එක්සත් ජාතීන් පෙන්වා දී ඇත.
කෙසේ වෙතත්, නීති ප්රතිසංස්කරණ, ආයතනික ශක්තිමත් කිරීම සහ විමර්ශන හරහා දූෂණ විරෝධී වැඩපිළිවෙළ ක්රියාත්මක වන බව පෙන්වා දී ඇති මෙම වාර්තාවේ, එයාර්බස් ගනුදෙනුව සම්බන්ධ විමර්ශනවලදී හිටපු ජනාධිපති මහින්ද රාජපක්ෂ මහතාගේ නම සඳහන් වීම සහ හිටපු ජනාධිපති රනිල් වික්රමසිංහ මහතාට එරෙහි අධිකරණ ක්රියාමාර්ග ද ඉදිරියට ගෙන යමින් පවතින බව වැඩිදුරටත් සඳහන් කර ඇත.
