අර්බුද රැසකට මුහුණ දී සිටින එක්සත් ජාතීන්ගේ සංවිධානයේ මීළඟ මහලේකම් ධුරය සඳහා ඉදිරිපත්ව සිටින ප්රධාන අපේක්ෂකයින් සිව්දෙනෙකු නිව්යෝර්ක් නුවර පිහිටි මූලස්ථානයේදී අඟහරුවාදා සහ බදාදා දිනවල සජීවී ප්රශ්න කිරීම්වලට (Live hearings) මුහුණ දීමට නියමිතය.
චිලී රාජ්යයේ මිෂෙල් බැචෙලට් (Michelle Bachelet), ආර්ජන්ටිනාවේ රෆායෙල් ග්රොසි (Rafael Grossi), කොස්ටාරිකාවේ රෙබෙකා ග්රින්ස්පන් (Rebeca Grynspan) සහ සෙනගල් රාජ්යයේ මැකී සෝල් (Macky Sall) දැනට නිල වශයෙන් ඉදිරිපත් වී සිටින අපේක්ෂකයින් වේ. මින් එක් අයෙකු වසර පහක කාලයක් සඳහා තේරී පත් වනු ඇති අතර, තවත් වසර පහක් සඳහා එම ධුර කාලය දීර්ඝ කර ගැනීමේ අවස්ථාව ද පවතී. මෙතෙක් කිසිදු කාන්තාවක් එක්සත් ජාතීන්ගේ මහලේකම් ධුරය හොබවා නොමැති වීම විශේෂත්වයකි.
පළමු අදියරේදී මිෂෙල් බැචෙලට් සහ රෆායෙල් ග්රොසි සාමාජික රටවල් සහ සිවිල් සංවිධාන නියෝජිතයින්ගේ ප්රශ්න කිරීම්වලට අඟහරුවාදා මුහුණ දෙන අතර, බදාදා දින රෙබෙකා ග්රින්ස්පන් සහ මැකී සෝල් ඊට සහභාගී වේ. ඉදිරි මාසවලදී තවත් අපේක්ෂකයින් මෙම තරඟයට එක්වීමේ හැකියාව පවතී.
වර්තමානයේ පවතින ඉරාන යුද්ධය සහ අනෙකුත් ගෝලීය අර්බුද හමුවේ එක්සත් ජාතීන්ගේ සංවිධානයේ වැදගත්කම ලොවට තහවුරු කිරීම සහ මූල්ය අර්බුද කළමනාකරණය කරමින් සංවිධානය ප්රතිසංස්කරණය කිරීම මීළඟ නායකයාට ඇති දැවැන්තම අභියෝගය වනු ඇතැයි විශ්වාස කෙරේ.
