මෛත්රී සහ අනුර යන ජනාධිපතිවරුන්ගේ පාලන කාලයන්හි පළමු මාස 18 තුළ සම්මත කරන ලද නීති ප්රමාණය සංසන්දනය කරමින් දේශීය චින්තන මණ්ඩලයක් විසින් නිකුත් කර ඇති මෑතකාලීන වාර්තාවක නිරවද්යතාවය පිළිබඳව එක්සත් ජාතික පක්ෂය (UNP) ප්රශ්න කරයි.
මෙම වාර්තාව හුදෙක් සම්මත වූ පනත්වල ප්රමාණය මත පමණක් පදනම් වී ඇති බවත්, එම පනත්වල ගුණාත්මකභාවය සහ ඒවා රටේ සංවර්ධනයට ඇති කළ බලපෑම නොසලකා හැර ඇති බවත් එක්සත් ජාතික පක්ෂය පවසයි. වර්තමාන රජයේ කාර්ය සාධනය සාධාරණීකරණය කිරීමේ අරමුණින් මෙම වාර්තාව සකස් කර ඇති බව ඔවුන්ගේ අදහසයි.
මෛත්රී රජයේ (යහපාලන) කාලසීමාව තුළ 19 වන ව්යවස්ථා සංශෝධනය, ජාතික ඖෂධ නියාමන අධිකාරිය පනත, තොරතුරු දැනගැනීමේ අයිතිවාසිකම පිළිබඳ පනත, සේවකයන්ගේ ජාතික අවම වැටුප් පනත, ආසියානු යටිතල පහසුකම් ආයෝජන බැංකු ගිවිසුම, සහ අපරාධ නඩු විධාන සංග්රහය සංශෝධනය වැනි රටේ ප්රජාතන්ත්රවාදය, වගවීම සහ සේවක සුබසාධනය උදෙසා අත්යවශ්ය නීති රැසක් සම්මත විය. ඊට සාපේක්ෂව, අනුර ජනාධිපතිවරයාගේ කාලසීමාව තුළ මෙම රජය පද්ධති වෙනසක් ගැන පොරොන්දු වුවද, හිටපු දේශපාලනඥයන්ගේ වරප්රසාද ඉවත් කිරීම වැනි කරුණු හැරුණු විට රටට සැබෑ බලපෑමක් කළ හැකි නීති ඉදිරිපත් කිරීමට අපොහොසත් වී ඇති බව එක්සත් ජාතික පක්ෂය චෝදනා කරයි.
රනිල් වික්රමසිංහ මහතාගේ 26 මසක පාලන කාලය තුළ රටේ ආර්ථික ප්රකෘතිය සඳහා අත්යවශ්ය වූ 22 වන ව්යවස්ථා සංශෝධනය, ආර්ථික පරිවර්තන පනත, ශ්රී ලංකා මහ බැංකු පනත සහ රාජ්ය මූල්ය කළමනාකරණ පනත ඇතුළු පනත් 75කට වැඩි ප්රමාණයක් සම්මත කර ගැනීමට හැකි විය. රටේ ආර්ථික සහ ප්රජාතන්ත්රවාදී ගමන් මඟ ශක්තිමත් කිරීම සඳහා අවශ්ය වන්නේ පනත්වල සංඛ්යාත්මක වර්ධනයක් පමණක් නොව, ඒවායේ අන්තර්ගතයේ ගුණාත්මකභාවය බවත්, වර්තමාන රජය එම අභියෝගය ජය ගැනීමට අපොහොසත් වී ඇති බවත් එක්සත් ජාතික පක්ෂය වැඩිදුරටත් අවධාරණය කරයි.
