ඇමරිකානු දේශසීමාවට ආසන්නව සිදු කෙරෙන විදේශීය ඔත්තු බැලීමේ ක්රියාකාරකම් හේතුවෙන් වොෂින්ටනයේ නොසන්සුන්තාවය වැඩි කරමින්, රුසියාව සහ චීනය කියුබාව තුළ තම බුද්ධි තොරතුරු මෙහෙයුම් පුළුල් කරමින් සිටින බවට ඇමරිකානු බලධාරීන් දැඩි කනස්සල්ල පළ කර තිබෙනවා. ද වෝල් ස්ට්රීට් ජර්නල් පුවත්පත වාර්තා කළ ඇමරිකානු බුද්ධි අංශ තක්සේරුවලට අනුව, බීජිං සහ මොස්කව් පාලනයන් 2023 වසරේ සිට කියුබානු දූපතේ පිහිටි ඉලෙක්ට්රොනික ඔත්තු බැලීමේ මධ්යස්ථාන නවීකරණය කර ඇති අතර එහි සිටින බුද්ධි අංශ නිලධාරීන් සංඛ්යාව ද ඉහළ නංවා තිබෙනවා. ෆ්ලොරිඩා ප්රාන්තයේ සිදුවන ඇමරිකානු මිලිටරි ක්රියාකාරකම් නිරීක්ෂණය කිරීම සඳහා මෙම මධ්යස්ථාන පිහිටුවා ඇති බවත්, ටැම්පා හි පිහිටි ඇමරිකානු මධ්යම අණදෙන මූලස්ථානය සහ මියාමි අසල පිහිටි ඇමරිකානු දකුණු අණදෙන මූලස්ථානයට අදාළ සන්නිවේදනයන් නිරීක්ෂණය කිරීම ද මෙහි අරමුණ බවයි වාර්තා වන්නේ.
මෙම බුද්ධි අංශ වාර්තා මඟින් කියුබාව තුළ ක්රියාත්මක වන තරංග ආශ්රයෙන් තොරතුරු රැස්කරන මධ්යස්ථාන 18ක් හඳුනාගෙන ඇති අතර, ඉන් මධ්යස්ථාන 3ක් චීනය විසින්ද මධ්යස්ථාන 2ක් රුසියාව විසින්ද ක්රියාත්මක කරන බව අනාවරණය වී තිබෙනවා. වොෂින්ටනය මෙම වර්ධනයන් දකින්නේ ඇමරිකාවේ ප්රතිවාදී රටවල් බටහිර අර්ධගෝලය තුළ තම බලය ශක්තිමත් කර ගැනීමට ගන්නා පුළුල් උත්සාහයක කොටසක් ලෙසයි. ට්රම්ප් පරිපාලනය මෙම බුද්ධි අංශ සොයාගැනීම් උපයෝගී කරගනිමින් කියුබානු රජය වෙත දැඩි ප්රතිපත්තියක් අනුගමනය කිරීමට පියවර ගෙන ඇති අතර, ඔවුන් තර්ක කරන්නේ කියුබාව ඇමරිකානු ප්රධාන භූමියට ආසන්නයේ සිදුවන රුසියානු සහ චීන මෙහෙයුම් සඳහා කඳවුරක් වී ඇති බවයි.
