කියුබානු ජනාධිපති මිගෙල් ඩියෙස්-කැනෙල් (Miguel Díaz-Canel) ඇතුළු එරට ඉහළ පෙළේ රාජ්ය නායකයින් සහ හමුදා ඉහළ නිලධාරීන් ඉලක්ක කරගනිමින් අමෙරිකා එක්සත් ජනපදය විසින් නව සම්බාධක පනවා ඇති බව විදෙස් මාධ්ය වාර්තා කරයි.
මෙම නව සම්බාධක යටතට කියුබානු ජනාධිපතිවරයා, ඔහුගේ බිරිඳ සහ සුළු පුත්රයා මෙන්ම කියුබාවේ හිටපු නායක රාවුල් කැස්ත්රෝගේ පුත්රයෙකු සහ මුණුපුරෙකු ද ඇතුළත් කර තිබේ. මේ වන විට අමෙරිකානු නාවික හමුදාව විසින් ක්රියාත්මක කරනු ලබන බලශක්ති අවහිරතාව හේතුවෙන් කියුබාව පුරා දැඩි ආහාර, ඖෂධ සහ ජල හිඟයක් නිර්මාණය වී ඇති අතර, දිනකට පැය 22ක් දක්වා දිවෙන දරුණු විදුලි බිඳවැටීම්වලට ද එරට ජනතාව මුහුණ දී සිටින පසුබිමක අමෙරිකාව මෙම දැඩි පියවර ගෙන ඇත.
අමෙරිකානු ජනාධිපති ඩොනල්ඩ් ට්රම්ප් ප්රකාශ කර ඇත්තේ ඉරානය සමඟ පවතින රාජ්යතාන්ත්රික සහ යුදමය ගැටුම් නිමවීමෙන් පසු තමන් කියුබාව දෙසට දැඩි අවධානය යොමු කරන බවයි. එමෙන්ම කියුබාව දැනටමත් ආර්ථික හා සමාජීය වශයෙන් “බිඳවැටුණු” මට්ටමක පවතින රටක් බව ද ට්රම්ප් ජනාධිපතිවරයා පවසා තිබේ.
අමෙරිකාවේ මෙම ක්රියාමාර්ගය දැඩි ලෙස හෙළා දකිමින් අදහස් දැක්වූ කියුබානු ජනාධිපති මිගෙල් ඩියෙස්-කැනෙල් කියා සිටියේ, මෙය සමස්ත කියුබානු ජනතාවම අන්ත අසරණ භාවයට පත් කිරීම සඳහා අමෙරිකාව දියත් කළ සාහසික ක්රියාවක් බවයි. කෙසේ වෙතත්, අමෙරිකාවේ මෙවැනි අධිරාජ්යවාදී බලපෑම් සහ තර්ජන හමුවේ කියුබාව කිසිසේත් නොසැලී ස්ථාවරව සිටින බව ද ජනාධිපතිවරයා වැඩිදුරටත් අවධාරණය කළේය.
