ලෝකයම බලාපොරොත්තුවෙන් සිටි සාම ගිවිසුම අබියස සිටියදී ඇමරිකානු සහ ඉරාන හමුදා අතර හෝමුස් සමුද්ර සන්ධිය ආසන්නයේ දරුණු වෙඩි හුවමාරුවක් සිදුව තිබේ. මෙම නවතම ගැටුම මසක් පුරා පැවති සටන් විරාමය පරීක්ෂාවට ලක් කළ බරපතළම සිදුවීම ලෙස වාර්තා වන අතර ඉරාන නෞකා ඉලක්ක කර ඇමරිකාව ප්රහාර එල්ල කළ බවට ඉරාන හමුදාව චෝදනා කරයි. කෙසේ වෙතත් ඇමරිකාව පවසන්නේ ඉරාන ප්රහාරවලට ප්රතිචාර ලෙස තමන් ක්රියා කළ බවත් තමන්ට කිසිදු හානියක් සිදු නොවූ බවත්ය.
වෙඩි හුවමාරුව සිදුවන අවස්ථාවේදී වොෂින්ටනයේ ලින්කන් ස්මාරකයේ ප්රතිසංස්කරණ කටයුතු නිරීක්ෂණය කරමින් සිටි ජනාධිපති ට්රම්ප් මාධ්ය වෙත අදහස් දක්වමින් පවසා සිටියේ සටන් විරාමය තවදුරටත් ක්රියාත්මක වන බවයි. ඉරානය තමන් සමඟ සෙල්ලම් කිරීමට උත්සාහ කළ බවත් තමන් ඔවුන්ට දැඩි ප්රතිචාර දැක්වූ බවත් පවසමින් ට්රම්ප් මෙම සිදුවීම සුළු කොට තැකීමට උත්සාහ කළේය. ඉරානය සමඟ සාම සාකච්ඡා තවදුරටත් ඉදිරියට යන බවත් ඉරානය තමන්ට වඩා ගිවිසුමකට එළඹීමට කැමැත්තෙන් සිටින බව තමන් විශ්වාස කරන බවත් ඔහු වැඩිදුරටත් සඳහන් කළේය.
මෙම ගැටුම්කාරී තත්ත්වය හේතුවෙන් ගෝලීය වෙළෙඳපොළේ බොරතෙල් මිල සියයට 3කින් පමණ ඉහළ ගොස් ඇති අතර ඇමරිකාව තුළ පෙට්රල් මිල ද ශීඝ්රයෙන් ඉහළ යමින් පවතී. ඉරානය පවසන්නේ තත්ත්වය මේ වන විට සාමාන්ය අතට හැරී ඇති බව වුවත් ඕනෑම ප්රහාරයකට පෙරළා දැඩි ලෙස ප්රතිචාර දැක්වීමට තමන් සූදානම් බවට ඔවුන් අනතුරු අඟවා තිබේ. න්යෂ්ටික වැඩසටහන වැනි තීරණාත්මක ගැටලු විසඳීමකින් තොරව යුද්ධය අවසන් කිරීමේ ඇමරිකානු යෝජනාව පිළිබඳව ඉරානය මෙතෙක් අවසන් තීරණයක් ගෙන නොමැති බව ද වාර්තා වේ.
