ඉරාන යුද්ධය තාවකාලිකව නතර වී ඇති (සටන් විරාම) පසුබිමක, ඇමෙරිකාව සහ ඉරානය අතර සාම ගිවිසුමක් ඇති කර ගැනීම පිළිබඳව දැඩි ව්යාකූල තත්ත්වයක් නිර්මාණය වී තිබේ. විශේෂයෙන්ම ඇමෙරිකානු ජනාධිපති ඩොනල්ඩ් ට්රම්ප් සහ ඉරාන බලධාරීන් නිකුත් කරන පරස්පර ප්රකාශ හේතුවෙන් ලෝකයම දැඩි අවධානයෙන් පසුවෙයි.
සාකච්ඡාවල දෙවන අදියර පකිස්ථානයේ ඉස්ලාමාබාද් නුවරදී පැවැත්වෙන බවත්, ඒ සඳහා උප ජනාධිපති ජේ.ඩී. වෑන්ස් (JD Vance) සහභාගී වන බවත් ඇමෙරිකාව මුලින් ප්රකාශ කළද, ඔහු සඳුදා රාත්රිය වන තෙක් ඇමෙරිකාවෙන් පිටත්ව නොගියේය. පසුව ට්රම්ප් විසින් වෑන්ස් පකිස්ථානයට යන බව තහවුරු කළත්, ඉරානය එය වහාම ප්රතික්ෂේප කළේය. ඉරාන පාර්ලිමේන්තු කථානායක මොහොමඩ් බගර් ගලිබාෆ් (Mohammad-Bagher Ghalibaf) පවසන්නේ කිසිදු සාකච්ඡාවක් සිදු නොවන බවත්, ඇමෙරිකාව උත්සාහ කරන්නේ සාකච්ඡා මේසය ඉරානය “යටත් කර ගැනීමේ මේසයක්” බවට පත් කිරීමට බවත්ය.
ට්රම්ප් විසින් “ඉතා ඉක්මනින් ගිවිසුමක් ඇති විය හැකියි” යනුවෙන් පවසන අතරම, “ගිවිසුමක් ඇති නොවුණහොත් බෝම්බ පිපිරෙනු ඇති” බවටත්, හර්මුස් සමුද්ර සන්ධිය අවහිර කරන බවටත් තර්ජනය කර තිබේ. ඉරානය පවසන්නේ මෙවැනි තර්ජන හමුවේ තමන් සාකච්ඡා සඳහා සූදානම් නොමැති බවයි. පකිස්ථානය පවසන්නේ දෙපාර්ශ්වයම සාකච්ඡා මේසයට ගෙන ඒම සඳහා තමන් උපරිම උත්සාහයක් දරන බවයි.
දැනට පවතින සටන් විරාමය උල්ලංඝනය කරමින් ට්රම්ප් විසින් වටලෑමක් සිදු කිරීමට උත්සාහ කරන බවට ඉරානය චෝදනා කරන අතර, මෙම රාජ්ය තාන්ත්රික ගැටුම සාමකාමී විසඳුමකට එනු ඇතිද නැතහොත් යුද්ධය නැවත ඇවිළෙනු ඇතිද යන්න තවමත් අවිනිශ්චිතය.
