අමෙරිකානු ජනාධිපති ඩොනල්ඩ් ට්රම්ප් සහ ඉරානය අතර පවතින රාජ්යතාන්ත්රික සාකච්ඡා “ඉතා සාර්ථක මට්ටමකින් ඉදිරියට යමින් පවතින බව” ධවල මන්දිරය නිල වශයෙන් ප්රකාශ කර තිබේ. මැදපෙරදිග කලාපයේ පවතින නොසන්සුන්කාරී වාතාවරණය හමුවේ මෙම සාකච්ඡා පිළිබඳව ලෝකයේම දැඩි අවධානයක් යොමුව ඇත.
ධවල මන්දිරයේ සහකාර මාධ්ය ලේකම් ඔලිවියා වේල්ස් මාධ්ය වෙත ඊමේල් පණිවිඩයක් නිකුත් කරමින් සඳහන් කර ඇත්තේ, ජනාධිපති ට්රම්ප් මෙම සාකච්ඡාවලදී අමෙරිකාවේ සීමාවන් සහ ස්ථාවරය ඉතා පැහැදිලිව පෙන්වා දී ඇති බවයි. අමෙරිකානු ජනතාවගේ ආරක්ෂාව සහ යහපත වෙනුවෙන් උපරිම සාධාරණ එකඟතාවකට පමණක් ජනාධිපතිවරයා එළඹෙනු ඇති අතර, ඉරානයට කිසිසේත්ම න්යෂ්ටික අවියක් නිෂ්පාදනය කිරීමට ඉඩ නොතැබීම එහි ප්රධානතම සහ අනිවාර්ය කොන්දේසිය වන බව ද ඇය අවධාරණය කර සිටියාය.
යුද ගිවිසුම් කතා ධවල මන්දිරය ප්රතික්ෂේප කරයි:
මේ අතර, පවතින යුදමය වාතාවරණය අවසන් කිරීම සඳහා දෙපාර්ශවය අතර අවබෝධතා ගිවිසුමක් ඇති කරගෙන තිබෙන බවට ඉරාන මාධ්ය පළ කළ වාර්තා ධවල මන්දිරය විසින් සම්පූර්ණයෙන්ම ප්රතික්ෂේප කර තිබේ. ඒවා කිසිදු පදනමක් නැති “සම්පූර්ණ අසත්ය ප්රබන්ධ” බව අමෙරිකාව පවසයි.
ධවල මන්දිර කැබිනට් මණ්ඩල රැස්වීමට පෙර මාධ්යවේදීන් ඇමතූ ජනාධිපති ඩොනල්ඩ් ට්රම්ප් කියා සිටියේ, ඉරාන නායකයින් මේ වන විට අමෙරිකාව සමඟ ගිවිසුමකට එළඹීමට දැඩි උනන්දුවකින් පසුවන බව තමන් විශ්වාස කරන නමුත්, පවතින ප්රගතිය පිළිබඳව තමන් තවම සෑහීමකට පත් නොවන බවයි. ඉරානය මීට පෙර තමන්ව මඟහරිමින් කාලය දිනා ගැනීමට උත්සාහ කළ බව පෙන්වා දුන් ට්රම්ප්, “ඔවුන් සිතුවේ මම ධුරයෙන් ඉවත්වන තුරු බලා සිටිය හැකියි කියායි. නමුත් දැන් ඔවුන්ට ගිවිසුමකට එළඹීම හැර වෙනත් කිසිදු විකල්පයක් ඉතිරිව නැහැ” යැයි ද වැඩිදුරටත් අවධාරණය කළේය.
