පසුගිය ජනවාරි මාසයේදී වෙනිසියුලානු ජනාධිපති නිකොලස් මදුරෝව (Nicolas Maduro) බලයෙන් පහ කිරීම සඳහා සිය යුද ශක්තිය භාවිත කිරීමෙන් අනතුරුව, ඇමරිකානු ජනාධිපති ඩොනල්ඩ් ට්රම්ප්ගේ පරිපාලනය මේ වන විට කොමියුනිස්ට් පාලනයක් පවතින කියුබාව වෙත ද සිය රාජ්ය තාන්ත්රික හා ආර්ථික පීඩනය දැඩි කර තිබේ. වෙනිසියුලාව කියුබාවේ ප්රධානතම දේශපාලන සහකරු වුවද, වත්මන් ඇමරිකානු මැදිහත් වීම් හමුවේ කියුබාව වෙනිසියුලාව මෙන් පහසුවෙන් බිඳ නොවැටීමට (Venezuela 2.0 නොවීමට) බලපාන ප්රධාන කරුණු කිහිපයක් දේශපාලන විචාරකයින් පෙන්වා දෙති.
වෙනිසියුලාවේදී ඇමරිකානු හමුදා මෙහෙයුමකින් මදුරෝව අත්අඩංගුවට ගැනීමෙන් පසු, එරට උප ජනාධිපතිනී ඩෙල්සි රොඩ්රිගස් (Delcy Rodriguez) වහාම වැඩබලන ජනාධිපතිනිය ලෙස පාලනය භාරගත්තාය. එමෙන්ම එරට නොබෙල් ත්යාගලාභී මරියා කොරිනා මචාඩෝ (Maria Corina Machado) වැනි ජනප්රිය විපක්ෂ නායකත්වයක් ද පවතී. නමුත් කියුබාවේ වත්මන් ජනාධිපති මිගෙල් ඩයස්-කැනෙල් (Miguel Diaz-Canel) හෝ ඇමරිකාව විසින් මේ වන විට චෝදනා ගොනුකර ඇති 94 හැවිරිදි හිටපු නායක රාහුල් කැස්ත්රෝ (Raúl Castro) වෙනුවට පාලනයට පැමිණිය හැකි එවැනි විකල්ප දේශපාලන බලවේගයක් හෝ ප්රබල විපක්ෂ නායකත්වයක් කියුබාව තුළ නිර්මාණය වීමට එරට ආරක්ෂක අංශ ඉඩ දී නොමැත.
වෙනිසියුලාවේ හමුදාවට වඩා කියුබානු හමුදාව දෘෂ්ටිමය වශයෙන් දැඩිව බැඳී පවතින අතර, රුසියාව සහ චීනය සමඟ පවතින දීර්ඝකාලීන සබඳතා හේතුවෙන් කියුබාවේ ඔත්තු සේවා සහ නිරීක්ෂණ තාක්ෂණය (Surveillance and Intelligence) ඉතා ඉහළ මට්ටමක පවතී. පසුගිය ජනවාරි මාසයේදී වෙනිසියුලාවේදී මදුරෝට ආරක්ෂාව සපයමින් සිටි කියුබානු නියෝජිතයන් පිරිසක් ඇමරිකානු ප්රහාරවලින් මියගිය ද, ඉන් බේරුණු පිරිස් ඇමරිකානු උපක්රම පිළිබඳව හොඳින් අත්දැකීම් ලබා සිටිති.
.
