ඉරානයට පනවා ඇති දැඩි ආර්ථික සහ වෙළඳ සම්බාධක මධ්යයේ ලෝක දේශපාලනය මෙන්ම ගෝලීය බලශක්ති වෙළඳපොළ ද දැඩි උඩුයටිකුරු කිරීමකට ලක් කරමින්, ඉරානයේ නිෂ්පාදිත බොරතෙල් ඇතුළු නිෂ්පාදන රැසක වෙළඳාම් කටයුතු සඳහා අමෙරිකාව විශේෂ අවසරයක් ලබා දී තිබෙනවා. විදෙස් මාධ්ය වාර්තා කරන්නේ ඉරාන බොරතෙල්, ඛනිජ තෙල් නිෂ්පාදන සහ පෙට්රොකෙමිකල් ද්රව්ය (Petrochemicals) නිෂ්පාදනය කිරීම, ජාත්යන්තරව බෙදාහැරීම මෙන්ම විවිධ රටවල් වෙත අලෙවි කිරීම සඳහා අවසර ලබා දෙමින් අමෙරිකානු මහා භාණ්ඩාගාර දෙපාර්තමේන්තුව (U.S. Treasury Department) විසින් මෙම විශේෂ පොදු බලපත්රය (General license) නිල වශයෙන් නිකුත් කර ඇති බවයි.
අමෙරිකානු රජය විසින් නිකුත් කරන ලද මෙම අනපේක්ෂිත නිල අවසරය එළඹෙන අගෝස්තු මස 21 වැනිදා දක්වා වලංගු වන බව ද එම විදේශීය වාර්තාවල පැහැදිලිව දැක්වෙනවා. දිගු කලක් තිස්සේ ඉරානයට එරෙහිව අමෙරිකාව ප්රමුඛ බටහිර පිරිස පනවා තිබූ දැඩි වෙළඳ තහංචි මධ්යයේ වුවද, වත්මන් ගෝලීය ආර්ථික අවශ්යතා සැලකිල්ලට ගනිමින් අමෙරිකාව ගත් මෙම හදිසි තීරණය ලෝක වෙළඳපොළේ ඉන්ධන මිල තීරණය කිරීම කෙරෙහි සෘජු හා දැවැන්ත බලපෑමක් එල්ල කරනු ඇති බවයි ජාත්යන්තර දේශපාලන සහ ආර්ථික විචාරකයින් එකඟතාවයකින් යුතුව පෙන්වා දෙන්නේ.
